Араас да дьон баар эбээт! Хара санааларыгар оннукка-манныкка тиийэллэр.
Горнай улууһун полициятын дьуһуурунай чааһыгар Бэрдьигэстээх сэлиэнньэтин олохтооҕуттан сайабылыанньа киирбит. Кини «Тойота Виста» массыынатын көлүөһэлэрин ким эрэ тэспитин туһунан.
Суһал-ирдиир тэрээһиннэр кэмигэр оперативниктар бу буруйу оҥорууга уорбаланааччыны туппуттар.
Бу 31 саастаах киһи түүн, анаан-минээн тиийэн, эмсэҕэлээччи дьиэтин таһыгар турар иномаркатын көлүөһэлэрин тоһоҕонон тэһитэлээбит. Быһаарыыта — ити массыына хаһаайынын сөбүлээбэтиттэн үһү!
Бу чахчынан РФ Холуобунай кодексатын 167-с ыст. 1 чааһынан, ол эбэтэр, атын киһи баайын-малын соруйан алдьатыы биитэр суох оҥоруу бэлиэтэ баарынан, холуобунай дьыала тэриллибит.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн