Мас тардыһыытыгар аан дойду Кубогын бастакы кыайыылаахтара билиннилэр
Москваҕа Саха сирин күннэрин чэрчитинэн ыытыллар Ил Дархан бирииһигэр мас тардыһыытыгар аан дойду Кубогын түмүк түһүмэҕэр сүүрбэ түөрт судаарыстыба баабыйдара кытталлар.
Бэҕэһээ Эспо-кииҥҥэ түһүлгэлэммит күрэхтэһиигэ эр дьон 60, 70, 80, 90, 125 киилэҕэ диэри, дьахталлар 55, 65, 85 киилэҕэ диэри ыйааһыҥҥа күрэс былдьастылар.
Дьахталларга Сардаана Осипова (55 кг), Ирина Севрюк (65 кг), Сайыына Седалищева (85 кг) чөмпүйүөн үрдүк аатын ыллылар.
Эр дьоҥҥо Дмитрий Саввин (60 кг), Сергей Константинов (70 кг), Дьулуур Климовскай (80 кг), Павел Черноградскай (90 кг) уонна Роман Калинин (125 кг) кыайыылаахтарынан буоллулар.
Бүгүн, ахсынньы 17-гэр, дьахталлар 75 киилэҕэ диэри, 85 киилэттэн үөһэ, эр дьон 105 киилэҕэ диэри уонна 125 киилэттэн үөһэ ыйааһыннарга ким күүстээҕин быһаарсыахтара.
Күрэхтэһии иккис күнүгэр мас тардыһыыны сэҥээрээччилэр болҕомтолоро, биллэн турар, 125 киилэттэн үөһэ ыйааһыҥҥа буолар күөн көрсүһүүлэргэ туһаайыллыаҕа. Манна Виктор Колибабчук, Сергей Фролкин, Мартин Лицис, Антанас Абрутис, Андрей Маркин курдук аар-саарга аатырбыт мадьынылар күөн көрсүөхтэрэ.
Роман ПОПОВ, «Саха сирэ» хаһыат, edersaas.ru