Мас тардыһыытыгар аан дойду чемпионатыгар Арнольд Шварценеггеры ыҥырдылар
Мас тардыһыытын аан дойдутааҕы IV чемпионатын Дьокуускайга ыытыы туһунан дьаһалы СӨ Ил Дархана Айсен Николаев таһаарда. Өрөспүүбүлүкэтээҕи успуорт национальнай көрүҥнэрин киинин дириэктэрэ Гаврил Мохначевскай СИА-ҕа иһитиннэрбитинэн, 50 дойдуттан спортсменнары кытыннарыыга кэпсэтии ыытылла турар эбит.
«Аан дойду чемпионата Саха АССР төрүттэммитэ 100 сылыгар ананар. Өрөспүүбүлүкэбит Ил Дархана Айсен Николаев олунньу 3 күнүгэр бэс ыйын 21-27 күннэригэр Дьокуускайга чемпионат ыытылларын туһунан дьаһал таһаарбыта. Тэрийэр кэмитиэти бырабыыталыстыба бэрэссэдээтэлин солбуйааччы Сергей Местников сүрүннүөҕэ. Аан дойдутааҕы мас тардыһыы федерациятын бэрэсидьиэнэ Александр Акимов бу сылга чемпионаты сайын ыытар туһунан этии көтөхпүтэ. Урут биһиги бу күрэхтэһиини сэтинньигэ ыытан турардаахпыт. Билигин 50 дойду кыттааччыларын кытта кэпсэтиилэри ыыта сылдьабыт. Урукку сылларга 39 дойдуттан кэлэн кыттыбыттара. Тэрээһин «Триумф» спорткомплекска уонна Үс Хатыҥҥа ыытыллара былааннанар«, — диэн Гаврил Мохначевскай иһитиннэрдэ.
Арассыыйа сүүмэрдэммит хамаандата Казань куоракка ыытыллар дойду чемпионатын түмүктэринэн быһаарыллыаҕа.
— Өрөспүүбүлүкэ Ил Дарханын аатыттан аан дойду чемпионатыгар дойду успуордун миниистирэ Олег Матыцины ыҥырдыбыт. Ону сэргэ Америка атлетын Мартинс Лицисаны уонна Арнольд Шварценеггеры ыҥыраары былаанныыбыт. Арнольд Шварценеггер уруккуттан биһиги национальнай көрүҥнэрбитин сэҥээрэр. Билиҥҥитэ Саха сиригэр ыалдьыттыы кэлэрэ дуу, кэлбэтэ дуу биллибэт. Бэлиэтээн эттэххэ, кэлэр ый саҥатыттан Огайо штатыгар кини аан дойдутааҕы «Arnoid classic» диэн турнира ыытыллар. Ол турнирга бырагыраама быһыытынан мас тардыһыы көрүҥэ киирэр, — диэн кэпсээтэ Гаврил Мохначевскай.
edersaas.ru