Саха сирэ автономиятын ылыммыта 100 сылыгар аналлаах мас тардыһыытыгар аан дойдутааҕы чемпионат бэс ыйыгар Дьокуускайга ыытыллыбыта. Мас тардыһыыта олимпиада биир көрүҥүн быһыытынан киирэригэр туох үлэ барарын туһунан Ил Дархан Айсен Николаев бүгүн “Саха” НКИХ биэриитигэр иһитиннэрдэ.
– Мас тардыһыытын аан дойдутааҕы чемпионата биһиэхэ бастакытын сайын ыытылынна. Үксүгэр бу күрэхтэһии сэтинньигэ буолар этэ. Чемпионакка барыта 40-тан тахса дойду кытынна. Мин санаабар, күрэхтэһии үрдүк таһымнаахтык ыытылынна. Бу спорт көрүҥэ хайа баҕарар Олимпиадаҕа киириэн сөп. Арассыыйаттан, мин көрдөхпүнэ, Олимпиадаҕа киирэр көрүҥнэртэн бу бастыҥнара. Манна сүрүн ирдэбил быһыытынан 85 дойдуга спорт бу көрүҥэр федерация баар буолуохтаах. 65 тыһыынчаттан тахса киһи дьарыктаныахтаах. Билигин мас тардыһыытынан дьарыктанар дьоммут ахсаана бу көрдөрүүгэ чугаһыыр. Ону сэргэ, билиҥҥи туругунан, 48 дойдуга мас тардыһыытыгар анал федерация баар. Онон спорпут бу көрүҥүн аан дойдуга таһаарарбытыгар өссө да үлэлэһиэхпитин наада, – диэн этэр Айсен Николаев.
Аграфена КУЗЬМИНА