Мас тардыһыытын аан дойдутааҕы чөмпүйэнээтин бастакы күнэ түмүктэннэ. Бүгүн, бэс ыйын 23 күнүгэр, «Триумф» спорт комплексыгар эр дьоҥҥо 60 кг, 80 кг, 105 кг, 125 кг, 125 кг үөһээ уонна дьахталларга 75 кг, 85 кг, 85 кг үөһээ ыйааһыҥҥа күөн көрүстүлэр.
Ол курдук, бастакы күн түмүгүнэн, 60 киилэ ыйааһыҥҥа Кыргызстан мадьыныта Азамат Асанов кыһыл көмүс мэтээли ылары ситистэ. Онон эрийсиилээх бастакы күҥҥэ Кыргызстан сүүмэрдэммит хамаандатыгар бастакы кыһыл көмүһү аҕалла. Иккискэ Мухаммад Саад (Пакистан), үһүскэ бэйэбит уолбут Герман Игнатьев уонна Конго мадьыныта Кимпеди Жарни таҕыстылар. Санатан эттэххэ, Герман Игнатьев 20 саастаах, Сунтаар улууһун Кутанатыттан төрүттээх. Кини тириэньэр Владимир Архиповка дьарыктаммыт.
80 киилэҕэ Арассыыйа сүүмэрдэммит хамаандатын спортсмена, Булуҥ улууһуттан төрүттээх Станислав Иванов инники күөҥҥэ таҕыста. Иккискэ Курек Оливер (Словакия), үһүскэ Нозимжон Саидхонов (Узбекистан).
105 кг ыйааһыҥҥа кыттыбыт аан дойду кылаастаах мадьыны Дмитрий Попов кыһыл көмүс мэтээли хамаандатыгар аҕалла. Кини аан дойду икки төгүллээх чөмпүйүөнэ. Иккискэ Кыргызстан бэрэстэбиитэлэ Атайбек Уулу Келдибек, үһүскэ Франсуа Фонго (Камерун) уонна Тогообат (Монголия) таҕыстылар.
125 кг Арассыыйаттан Иван Галкин бастаата. Кини Калугаттан төрүттээх, 24 саастаах. Бу ыйааһыҥҥа иккис Афзал Вакас (Пакистан), үһүс Икоуджор Олегбин (Того), Ырысбаев Улукбек (Кыргызстан) буоллулар.
125 кг үөһээ ыйааһыҥҥа ааттаах-суоллаах Виктор Колибабчугу баһыйар мадьыны быйыл да көстүбэтэ. Ол курдук иккис миэстэҕэ Веро Алекс (Венгрия), уонна үһүскэ Влада Ратков (Сербия), Эдуардо Доминго Висциглиа (Аргентина) таҕыстылар.
Дьахталларга:
75 кг:
Бастакы миэстэҕэ — Ирина Севрюк (Арассыыйа)
Иккис миэстэҕэ — Ольга Сукач (Аан дойдутааҕы федерация)
Үһүс миэстэҕэ — Эльдана Болотбекова (Кыргызстан), Гульноза Режабова (Узбекистан)
85 кг:
Бастакы миэстэҕэ — Мохинур Абдузоирова (Арассыыйа)
Иккис миэстэҕэ — Олеся Гуреева (Узбекистан)
Үһүс миэстэҕэ — Назия Маилибашева (Кыргызстан), Гантоли Сена Трезория (Бенин)
85 кг үөһээ:
Бастакы миэстэҕэ — Татьяна Баишева (Арассыыйа)
Иккис миэстэҕэ — Сзокс Петра (Венгрия)
Үһүс миэстэҕэ — Муслимахон Саидова (Таджикистан), Эрденетуя Байантугс (Монголия).
edersaas.ru