Шварценеггер ыҥырыллар чөмпүйэнээтигэр икки сүүстэн тахса мадьыны күрэхтэһиэ

Ааптар: Эдэр Саас

Бөлөххө киир:

Мас тардыһыыга аан дойду чөмпүйэнээтигэр 31 дойдуттан 224 спортсмен кыттара бигэргэтиллибит.

Саха сиригэр мас тардыһыыга аан дойду IV чөмпүйэнээтэ быйыл бэс ыйын 21-27 күннэригэр ыытыллыахтаах. Күрэхтэһии «Триумф» киэҥ-куоҥ уораҕайыгар ыытыллар.

Түмүктүүр күрэхтэһиилэр Үс Хатыҥҥа Туймаада ыһыаҕын кэмигэр буолаллара былааннанар.

СӨ физкултуураҕа уонна успуорка миниистири солбуйааччы Александр Бугаев тэлэбиисэринэн «Актуальное интервью» биэриигэ, мас тардыһыыга аан дойду чөмпүйэнээтэ РФ успуордун министиэристибэтин халандаарынай былааныгар ураты суолталаах тэрээһин быһыытынан киллэриллибитин эттэ. Чөмпүйэнээт бырагырааматынан мас-рестлинг норуоттар икки ардыларынааҕы федерациятын Кэнгириэһэ ыытыллар.

Олимпийскай көрүҥҥэ киллэриллибит успуорт национальнай көрүҥнэрэ уонна оонньуулара элбэхтэр. Онтон мас тардыһыыта успуорт көрүҥүн быһыытынан сайдан иһэр уонна аан дойду аренатыгар күрэстэһэр кыахтаах. СӨ Ил Дархана Айсен Николаев мас тардыһыыта 20 сылынан олимпийскай көрүҥ буолуон сөп диэн санаатын биллэрэн турар.

«Мин санаабар, мас-рестлинг олимпийскай көрүҥ буолар кыахтаах Саха сирин успуордун соҕотох көрүҥэ. Биһиги бу туһунан атын дойдулар МОК чилиэннэрин кытта кэпсэтэн турабыт. Өскөтүн былааннаах үлэ оҥоһуллар түгэнигэр, 30-с сыллар бүтүүлэригэр, 40-с сыллар саҕаланыыларыгар успуорт бу көрүҥэ олимпийскай буолар кыахтаах«, — диэбитэ Ил Дархан.

Санатан эттэххэ, мас тардыһыыга аан дойду IV чөмпүйэнээтин Дьокуускай куоракка ыытар туһунан быһаарыы 2019 сыллаахха сэтинньигэ, Польшаҕа мас-рестлинг норуоттар икки ардыларынааҕы федерациятын Кэнгириэһигэр ылыллыбыта. 2022 сыл олунньу 4 күнүгэр СӨ Ил Дарханын 47 №-дээх «О подготовке и проведении IV Чемпионата мира по мас-рестлингу в г.Якутске» дьаһала тахсыбыт.

Билиҥҥи туругунан 31 дойдуттан 291 бэрэстэбиитэл, 224 спортсмен кытталларын бигэргэппиттэр. Бу Азербайджантан, Арменияттан, Бангладештан, Боливияттан, Бразилияттан, Великобританияттан, Венгрияттан, Грецияттан, уо.д.а. дойдулартан.

Эр дьон тоҕус ыйааһыҥҥа күөн көрсөллөр: 60, 65, 70, 75, 80, 90, 105, 125 уонна 125+ кг. Дьахталлар: 55, 65, 75, 85 уона 85+ кг.

Санатар буоллахха, бу чөмпүйэнээккэ Америка атлетын Мартинс Лицисаны уонна Арнольд Шварценеггеры ыҥыраары былааннаабыттара.