Уопсастыба Успуорт

Мас тардыһыыбыт норуоттар икки ардыларынааҕы таһымнаах бэстибээл сүрүн бырагырааматыгар киллэрилиннэ



Атырдьах ыйын 11 – 16 күннэригэр Ульяновскай уобаласка Көҥүл судаарыстыбалар түмсүүлэригэр (КСТ) киирэр дойдулар национальнай спорт көрүҥнэрин, оонньууларын бастакы бэстибээлэ ыытыллар.

Владимир Путин тус сорудаҕынан тэриллэр тэрээһиҥҥэ Арассыыйаттан, Белоруссияттан, Казахстантан, Арменияттан, Киргизияттан, Молдавияттан, Туркменияттан, Таджикистантан, Узбекистантан, Азербайджантан тыһыынчаттан тахса спортсмен спорт 15 көрүҥэр кэлэн күрэс былдьаһыаҕа. Барыта 73 мэтээл комплега оонньонуоҕа. Ону сэргэ КСТ киирэр дойдулартан бочуоттаах ыалдьыттар, Арассыыйа регионнарыттан делегациялар кэлэллэрэ күүтүллэр. Биэс күннээх тэрээһининэн барыта 70-тан тахса тыһыынча киһи хабыллыа диэн буолар.

Сүрүн күрэхтэһиилэр бырагыраамаларыгар самбоны, ханаат тардыһыытын, “городкины”, лаптаны, мээчиктээх хоккейы (мини), киирэ спордун, саахыматы, оҕунан ытыыны, курдаһан тустууну сэргэ сахалар мас тардыһыыбыт киллэрилиннэ.  Ону тэҥэ бэстибээл кыттыылаахтарыгар хотугу многоборьены, сахалыы ыстаныылары, хапсаҕайы билиһиннэриэхтэрэ.

Бэстибээл биэс сиринэн – “Лидер” физкультурнай-чэбдигирдэр комплекска, ипподромҥа, “Симбирскай” стадиоҥҥа, “Торпедо” СК – тэҥинэн ыытыллыахтара. Оттон киин былаһаакканан “Волга-Спорт-Арена” Спорт дыбарыаһа буолуоҕа.

Роман Попов, “Саха сирэ” хаһыат

Ааптар хаартыскаҕа түһэриитэ.

0
0

Санааҕын суруй