Мас көөбүлүнэн эргинэр Дмитрий Захаров
Олох-дьаһах - Саха ыала

Мас көөбүлүнэн эргинэр Дмитрий Захаров

“Саха сирэ” хаһыат суруналыыстара Чурапчыга командировкабыт кэмигэр, олохтоох табаары оҥорон таһаарааччылар 12-с форумнара ыытылынна. Форум кыттыылаахтарыттан ордук чорботон эдэр урбаанньыт Дмитрий Захаровы бэлиэтиэхпит этэ. Кини олус судургу эрээри, дьоҥҥо туһалаах хайысханы таба тайаммыт — мас көөбүлүн атыылыыр.

edersaas.ru

Ким өйүгэр көтөн түһүө баарай, бөх буола сытар харбылтан харчы киллэриниэххэ сөп диэн. Арай, тустаах эйгэҕэ сыһыаннаах эрэ киһи бэлиэтии көрүөн сөп.
Бэйэм тутуу эйгэтигэр үлэлээбитим. Ол сылдьан дьон чопчу мас көөбүлүгэр, дьиэ сылааһын тутар матырыйаалга наадыйарын бэлиэтии көрбүтүм. Барытын үөрэтэн көрөн баран, соҕурууттан үс тэрили сакаастаан ыллым. Онон Чурапчыга көөбүл оҥорор мини-сыах тэрийдим. Инникитин кэҥэттэр былааннаахпын, – диэн кэпсиир.
Дмитрий олохтоох пилорама хас да сыл устата мунньубут, туһаҕа барбат харбыылын итиэннэ эргэ мастары барытын хомуйан, бөҕүн-саҕын ыраастаан көөбүл оҥорор. Инньэ гынан, үс куобаҕы тэҥинэн өлөрөр – нэһилиэгин ыраастыыр, дьоҥҥо туһалыыр уонна бэйэтигэр харчы киллэринэр.
Бэйэтэ харбыылы тиэйиинэн, батарыынан дьарыктанар. Ону таһынан, икки үлэһиттээх. Быйыл Чурапчы улууһугар биллэриллибит Оҕо уонна ыччат дьоҕурун сайыннарыы сылын иитинэн, сайыҥҥы сынньалаҥ кэмигэр аймахтарын оҕолорун көөбүлү кууллааһыҥҥа кыра хамнастаан үлэлэппит. Оттон бэйэтин уолун этэ да барыллыбат, кыратыттан окко-маска батыһыннара сылдьан үлэнэн иитэр.
Эдэр урбаанньыт куулунан дуогабардаһар судургу, барыта дьэҥкэтик көстө сылдьар итиэннэ дьон дьиэ үрдүгэр таһааралларыгар даҕаны чэпчэки диэн этэр. Сайыҥҥы икки ый устата Чурапчы улууһун хааччыйбыт. Оннооҕор чугастааҕы улуустартан, куораттан тиийэ атыылаһан барбыттар.
Билигин биирдии куулун 100 солк. атыылыыр эбит. Онно көөбүл, куул уонна Чурапчы сэлиэнньэтигэр босхо тиэрдии барыта киирэ сылдьар. Эдэр урбаанньыт былаана киэҥ, сыыйа Илин Эҥэргэ тахсар толкуйдаах.

Людмила ПОПОВА, “Саха сирэ” хаһыат, edersaas.ru

4
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

9 − 5 =