“Mas expo” өрөспүүбүлүкэтээҕи быыстапка Дьокуускайга аан бастаан 2016 сыллаахха буолан турар. Тэрээһин иккис төгүлүн “Куруһаала” атыы-эргиэн дьиэтин киэҥ-куоҥ уораҕайыгар бэҕэһээ, бүгүн олус сэргэхтик ыытылынна.
Тэрийээччи Надежда Идэлги түһүлгэҕэ Кэбээйиттэн, Чурапчыттан, Сунтаартан, Уус Алдантан, Хаҥаластан, Дьокуускайтан уопсайа 25 мас ууһа мустубутун этэр.
Кыраһыабай бэйэлээх иһит уурар ыскааптар, хопполор, мааны сандалылар, олох мастар, муусука үстүрүмүөннэрэ, иһит-хомуос эгэлгэтэ саалаҕа толору тардыллыбытын дьон-сэргэ бу икки күн устатыгар сөҕө-хайгыы көрдө-иһиттэ. Уустар төлөпүөннэрин сураһааччы, үлэһээччи үксээтэ, тутатына атыылаһааччылар да баар буоллулар. “ЦентрДомСтрой” хампаанньа үлэһиттэрэ алаһа дьиэни туттарга сүбэлэрин дьон-сэргэ улаханнык сэргээтэ, элбэх ыйытыылары биэрдилэр.
—Быыстапка мас уустарын сомоҕолуур, үлэлэрин киэҥ араҥаҕа таһаарар, күүскэ тарҕатар, үөрүйэхтэрин атастаһыннарар, билиилэрин-көрүүлэрин, сатабылларын кэнчээри ыччакка иҥэрэр, өбүгэлэрбит үгэстэрин сөргүтэр, салгыыр сыаллаах-соруктаах ыытыллар.
Бастакы күннээҕи үлэ түмүгүнэн СӨ инвестиционнай сайдыыга уонна урбааҥҥа министиэристибэтэ кыттыылаах “төгүрүк остуол” буолла. Манна уустар үлэни сайыннарарга, кэҥэтэргэ өйөбүл наадатын бэлиэтээтилэр. Итини сэргэ, оскуолаларга үлэ уруогун элбэтэр буоллар, оҕолор үлэҕэ сыстаҕас буола улаатыахтара этэ диэн санааларын эттилэр. “Үлэ уруогун аҕыйатыы, оҕону үлэттэн тэйитии” диэтилэр. Оҕо илиитинэн тутан-хабан, сыралаһан, урукку курдук уһуйулларыгар баҕаралларын биллэрдилэр.
Иккис күн бэртээхэй маастар-кылаастар ыытылыннылар. Уус Алдан ууһа Гаврил Иванов бэйэ оҥорор миэбэлин хайдах оһуордууру-мандардыыры көрдөрдө, сүбэ-ама биэрдэ. Хаҥаластан кэлбит Сергей Петров чороону хаһан ойуулуурга үөрэттэ-такайда. Роман Готовцев (Дьокуускай) иэтинэн чороон иһин хаһан оҥорорго баҕалаахтары уһуйда. Онтон да атын уустар бэйэлэрин кистэлэҥнэриттэн үллэһиннилэр, — диир Идэлги.
Тэрээһин бүтүүтэ ыраахтан-чугастан мустубут уран тарбахтаах уустар оҥоһуктарыгар ыытыллыбыт күрэс түмүгүнэн кыайыылаахтары эҕэрдэлээтилэр.
“Үс атахтаах чороон” анал аат кыайыылааҕынан Василий Калининскай (Уус Алдан, Танда) тахсан үөрүү-көтүү өрөгөйө буолла. Иккис миэстэҕэ Мичил Бурцев (Дьокуускайдааҕы художественнай училище), үһүскэ Сергей Петров (Хаҥалас) таҕыстылар.
“Сахалыы быһыылаах остуол” номинацияҕа Петр Толстоухов (Чурапчы) бастаан дохсун ытыс тыаһынан арыалланна. Константин Кондратьев (Дьокуускай) иккистээтэ. Егор Бубякин (ДьХУ) үһүстээтэ.
“Аҕа баһылык олох маһа” — Гаврил Иванов (Уус Алдан) 1 миэстэни ылан эҕэрдэлэннэ. Ариан Спиридонов (Кэбээйи) 2 миэстэҕэ, Саргылаана Алексеева (Ньурба) 3 миэстэҕэ тиксэн үөрдүлэр.
Былатыан Ойуунускай аатынан Судаарыстыбаннай бириэмийэ лауреата, норуот маастара Эрнст Алексеев бэрэссэдээтэллээх сыаналыыр сүбэҕэ бары да уус ааттаахтара, ытык дьон В.В.Яроев, Нь.В.Филиппова, Г.Н.Родионов, А.Н.Гоголев кытыннылар. Кыайыылаахтарга дипломнар, сыаналаах бириистэр туттарылыннылар. Кыттыбыт бары уустарга сэртипикээттэр бэрилиннилэр. Дьүүллүүр сүбэ чилиэттэрэ күрэскэ былыргы уустар туттар ньымалара, ирдэбил төһө тутуһуллубутун, үлэ таһымын, оһуору-мандары сөпкө туһаныыны, о.д.а. көрбүттэр, сыаналаабыттар. Ол курдук, холобур, аҕа баһылык олох маһыгар мас сааһа көстүөхтээх, тоһоҕо туттуллубат диэн ирдэбил туруоруллубут. Үс атахтаах чорооҥҥо илиинэн кыһыы суола көстөр буолуохтаах, чороон үрдүгэр 30, 40 см диэн эрдэттэн биллэриллибит.
Сэргэх тэрээһин сүүйүүлээх оонньуунан түмүктэннэ. Бааттаахтар сахалыы иһиттэн, сыаналаах игиигэ, үс атахтаах мааны сандалыга тиийэ сүүйдүлэр.
“Мир инструментов” маҕаһыын, “Туймаада” ТРК, “ЦентрДомСтрой” ХЭУо тэрээһини өйөөбүттэр, көмөлөспүттэр. СӨ инвестиционнай сайдыы уонна урбаан министиэристибэтэ, “Уус Экспо”, “Якутия” маһы таҥар кластер тэрийбиттэр.
Түһүлгэҕэ үлэлиир үгэннэригэр сылдьар эдэр дьон хото кыттыбыттара кэрэхсэбиллээх. Онтон аҕам саастаахтар быыстапка кыттыылаахтарыгар сүбэлэринэн-амаларынан көмөлөспүттэрэ, уруккуну-хойуккуну санаан-ахтан ааспыттара ордук улахан үөрүүлээх.
Сардаана БАСНАЕВА, “Саха сирэ” хаһыат, edersaas.ru