Москваҕа Экспо-кииҥҥэ мас тардыһыытыгар СӨ Ил Дарханын бирииһигэр аан дойду Кубогын түмүк күрэхтэһиитэ буолла. Күүтүллүбүтүн курдук, сүрүн болҕомто 125 киилэттэн үөһэ ыйааһыҥҥа күрэхтэһэр мадьыныларга туһаайылынна.
Саха сирин күннэрин чэрчитинэн ыытыллыбыт турнирга Томпо баабыйа Сергей Фролкин уһун сылларга хотторуу хомолтотун билбэтэх, ааттаах-суоллаах Виктор Колибабчугу 2:0 ахсаанынан кыайан сөҕүмэр ситиһиилэннэ, биир дойдулаахтарын, спорду сэҥээрээччилэри олуһун диэн үөртэ.
Кыайыылааҕы быһаарар киирсиигэ Сергей кэнники кэмҥэ сүрдээҕин эбиллибит Мартинс Лицискэ (АХШ) баһыйтаран иккис буолла.
Үһүс миэстэни былдьаһыыга Виктор Колибабчук американец Альфредо Арелланд Эспинозаны таһаҕас оҥостубата, эрэллээхтик кыайда.
Дмитрий Попов (Арассыыйа, Саха сирэ) 105 киилэҕэ диэри ыйааһыҥҥа тэҥнээҕин булбата. Дьахталларга 75 киилэлээхтэргэ Ирина Заславская (Украина) кыһыл көмүс мэтээли ылла. 85 киилэҕэ диэри ыйааһыҥҥа уопуттаах Татьяна Григор бастаата.
Роман Попов, «Саха сирэ» хаһыат