Соторутааҕыта Дьокуускайдааҕы потребительскай кооперация эргиэн-экономическай коллеһыгар “Килиэп – доруобуйаҕа туһалаах аһылык төрдө” дьыалабыай оонньуу ыытылынна. Манна Нөмүгүтээҕи килиэп собуота быыстапкаҕа бэйэтин бородууксуйатын көрдөрдө. Биһиги саҥа килиэп оҥоһуктары сэргээтибит. Устудьуоннар даҕаны кинилэртэн хаалсыбатыбыт.
Дьыалабыай оонньуу кэмигэр моонньоҕонтон мармелады, уулаах отон начыыннаах сакалаат кэмпиэти, уохта отонноох ватрушканы, киэдир эриэхэлээх ботуону бэлэмнээбиппит. Ону, соһуйуохпут иһин, Нөмүгү кэмбинээтин үлэһиттэрэ олус биһирээтилэр. Ол курдук, генеральнай дириэктэр Евгений Никифоров биһигини талбыт идэҕитигэр айымньылаахтык сыһыаннаһар эбиккит диэн хайҕаата.
Биһиги айбыт астарбытын анал эксперт, “Арассыыйатааҕы нутрициологтар, диетологтар уонна ас-үөл индустриятын үлэһиттэрин сойууһун” регионнааҕы салаатын салайааччыта Ульяна Лебедева үрдүктүк сыаналаата. Кини этэринэн, билигин оскуола үөрэнээччилэрин менюта оҥоһулла сылдьарынан, биһиги киллэрбит саҥа этиилэрбит онно туһаныллыахтарын сөп. Тоҕо диэтэххэ, оҕо оскуола эрдэхтэн доруобуйатыгар буортута суох аһы аһыыра улахан суолталаах.
Биһиги бу собуоту кытта салгыы үлэлэһиэхпит диэн эрэнэбит. Килиэп кэмбинээтин баазатыгар быраактыкаланарбыт бэрт буолуо этэ, исписэлиистэртэн уопут ылыахпыт турдаҕа.
Бу оонньууга товаровед уонна логист идэҕэ үөрэнэр устудьуоннар эмиэ кытыннылар. Инникитин оҥорон таһаарар тэрилтэни кытта ыкса ситимнээхтик бииргэ үлэлиэхпит.
ТХ-16 устудьуоннара,
edersaas.ru саайтка анаан.