Анал маркировката суох түүлээх таҥаһы Россия территориятыгар атыылааһын сокуонунан бобулунна. Ол курдук маҕаһыыннарга, атыы-эргиэн кииннэригэр, ырыынактарга атыыланар саҕынньахтар RFID-меткалаах (Radio Frequency IDentification, радиочастотная идентификация товаров) буолуохтаахтар. Судургутук эттэххэ, штрих-кодтаналлар.
Анивера Акимова, «Саха сирэ» хаһыат, www.edersaas.ru
Маркировката суох сыаналаах түүлээҕинэн эргинэр урбаанньыттар административнай уонна холуобунай эппиэтинэскэ тардыллыахтарын сөп. Сокуон олоххо киириэҕиттэн, Россия үрдүнэн уопсайа 300 мөл. солк. суумалаах 5000 кэриҥэ маркировката суох саҕынньах атыыттан уһуллубут. «Манньыаттаах» ырыынак атыыһыта Ольга Толстоухова иһитиннэрбитинэн, хас биирдии сон штрих-кодтанан, онно табаар хаһан, ханна оҥоһуллубута көстөр эбит.
Роспотребнадзор Саха сиринээҕи управлениетын инспектордара былааннамматах 18 бэрэбиэркэни ыытан, номнуо 2 тэрилтэ административнай эппиэтинэскэ тардылынна. Онон, маркировката суох саҕынньаҕы атыылыы сатаатахтарына, Роспотребнадзор Саха сиринээҕи управлениетыгар биитэр улуустарга баар отделениеларга биллэриҥ.
Анивера АКИМОВА.