Тохсунньу 21 күнүгэр М.Н.Жирков аатынан Дьокуускайдааҕы музыкальнай колледжка Марк Жирков сылын түмүктүүр үөрүүлээх тэрээһин буолла.
edersaas.ru
Үс өрүттээх сөбүлэһиилэр
Саха бастакы уһулуччулаах композитора Марк Жирков сылын түмүктээһин чэрчитинэн дьоһуннаах докумуоннар ылылынныллар:
– П.И.Чайковскай аатынан Москватааҕы судаарыстыбаннай консерваторияны, СӨ Култуураҕа уонна духуобунай сайдыыга министиэристибэни уонна Бүлүү улууһун дьаһалтатын кытары үс өрүттээх Сөбүлэһии түһэрсилиннэ.
— СӨ Култуураҕа уонна духуобунай сайдыыга министиэристибэтэ итиэннэ Бүлүү улууһун дьаһалтата бииргэ үлэлиир туһунан үс өрүттээх Сөбүлэһиигэ илии баттаатылар.
— Үрдүк үөрэх кыһаларын икки ардыларыгар эдэр вокалистарга Марк Жирков аатынан бастакы куонкуруһу ыытыы үс өрүттээх балаһыанньата оҥоһулунна. Куонкурус икки сылга биирдэ икки түһүмэҕинэн барыаҕа. Түмүк куонкурус 2018 с. сэтинньигэ Москваҕа ыытыллара былааннанар.
— Бүлүү улууһа уонна М.Н.Жирков аатынан Дьокуускайдааҕы музыкальнай колледж бииргэ үлэлиир туһунан сөбүлэһии түһэристилэр.
Саха муусукатын Прометейын туһунан кинигэ
Бу күн Опера уонна балет тыйаатырын артыыстара И.Колодезников, сцена уонна судаарыстыбаннай сулууспа бэтэрээнэ И.Данилов, Бүлүү эдэр мусукааннара уо.д.а. талааннар кыттыылаах кэнсиэри мустубут дьон дуоһуйа көрдө.
Баһылык Сергей Винокуров Марк Жирков 125 сыллаах үбүлүөйэ үрдүк таһымнаахтык ааһарыгар кыттыбыт дьоҥҥо махтанна уонна буруолуу сылдьар сабыс-саҥа кинигэни бэлэх уунна. Марк Николаевич туһунан «Саха сирин уһулуччулаах дьоно» сериянан тахсыбыт альбом-кинигэни Н.Н.Иванова, Т.Н. Семенова оҥордулар. Научнай салайааччынан А.П. Решетникова үлэлээтэ. Н.Н.Иванова уонна В.Ф. Тихонова хомуйбут хаартыскалара киллэрилиннилэр.
Тэрээһин биир долгутулаах түгэнинэн үс космонавт бүлүүлэри Марк Жирков сылынан эҕэрдэлээбиттэрин иһитиннэрии буолла.
Аата тыйаатырга иҥэриллиэ дуо?
СӨ култуураҕа уонна духуобунай сайдыыга миниистирэ Владимир Тихонов эҕэрдэ тылыгар Олоҥхо ыһыаҕа үрдүк таһымнаахтык ыытыллыбытын уонна биир дойдулаахтарыгар, уһулуччулаах композиторга аналлаах тэрээһин федеральнай таһымҥа барбытын тоһоҕолоон бэлиэтээтэ. Композитор Владимир Индигирскэй Опера уонна Балет тыйаатырыгар М.Жирков аата иҥэриллэрэ наадатын туһунан санаатын үллэһиннэ.
Бүлүү сирэ умнубат
«Саха Өрөспүүбүлүкэтин таһыгар олорор тыһыынчанан ахсааннаах биир дойдулаахтарбыт саха бастакы композитора Марк Николаевич Жирков саха муусукатыгар, балетыгар, театральнай искусствотыгар оруолун билбэт этилэр. Онтон кини биир дойдулаахтарын, Бүлүү улууһун дьаһалтатын уонна култуура кэккэ тэрилтэлэрин көҕүлээһиннэринэн уонна кыһамньыларынан Марк Жирков аата дойдуга барытыгар ньиргийдэ. Ол курдук, үбүлүөйдээх дьаһаллар, элбэх куонкурустар, конференциялар, кэнсиэртэр, кинигэлэри сүрэхтээһин тэрилиннилэр. Бу барыта телевидение киин ханаалларыгар уонна сонуну киэҥник тарҕатар сириэстибэлэргэ сырдатылынна.
Марк Жирков түөрт уонтан тахса сыл олорбут Бүлүүтүн сирэ аан дойду муусукатыгар саҥа ааты, саҥа композиторы, саҥа хайысханы бэлэх ууммута үйэлэргэ умнуллуо суоҕа.
Биһиги улуукан уолбут Прометей уобараһынан билиниллэр. Кини хоту дойду дьонугар искусство кыымын сахпыта, кинилэр ис туруктарын итиэннэ Олоҥхону муусука нөҥүө тириэрдэллэригэр үөрэппитэ, саха муусукатын инструменнарын тарҕаппыта», – диэн үөрүүлээх дьаһалга мустубут дьон киэн тутта ааттыыр киһилэрин истиҥник-иһирэхтик аҕыннылар.
Ыһыах ыһыахтара
«Марк Жирков сыла салҕанар. Биир дойдулаахтарбытыгар уонна сүгүрүйээччилэрбитигэр көмөҕүт, өйөбүлгүт иһин үс сүрэхтэн сүгүрүйэбит», – диэн Бүлүү улууһун баһылыгын социальнай бэлиитикэҕэ солбуйааччы Венера Тихонова махтал тылларын тириэртэ. Кырдьыга да, аны сайын бүлүүлэр Благовещенскайга, Москваҕа, Питергэ саха култууратын тарҕатар сыаллаах-соруктаах Ыһыах ыһыахтара.
Надежда ЕГОРОВА, «Саха сирэ» хаһыат, edersaas.ru