Быйылгы “Мисс Виртуальная Якутия 2017” күрэхтэһии кыайыылааҕа Уус Алдан кэрэ куота Мария Заровняева “Эдэр Саас” редакциятыгар эксклюзивнай интервьюта:
“Кэргэмминиин үҥкүүгэ билсибиппит”
Биһиги билсибиппит номнуо алтыс сылыгар барда. Эдэр дьон буоламмыт аан маҥнай бэйэ-бэйэбитин үҥкүүлүү сылдьан көрбүппүт. Табаарыһым кэлэн: “Биир уол билсиэн баҕарар”, — диэбитэ. Ол саҕана бары “Вконтакте” интернет ситимигэр олорорбут. Кини миигин онно булан суруйан киирэн барбыта. Көрбүтүм төрөөбүт күнэ оруобуна миэнин курдук этэ: биир күн, ый, сыл – 22.02.92. “Хайдах итинник буолуой?” — дии санаабытым. Ол оннук хаалбыта, пааспарын көрүөхпэр диэри итэҕэйбэт этим. Онтукам, кырдьык, миигинниин биир күн төрөөбүт эбит!
Бастаан табаарыстыы этибит, кэлин төрөөбүт күммүтүнэн эҕэрдэлэһэр, кэпсэтэр, көрсөр буолбуппут.“Уруубутугар сахалыы таҥаһы кэппиппит”
Владимирдыын уруубутугар сыл инниттэн бэлэмнэммиппит, элбэх дьон билэр этэ. Сотору кэминэн Олоҥхо тыйаатырын дьоно биһиэхэ сибээскэ тахсыбыттара уонна саха таҥаһын туһунан “Сүктэр кыыс уобараһа” диэн бырайыактарын кэпсээбиттэрэ уонна “маҥнайгынан эһиэхэ кэтэрдиэхпитин баҕарабыт”, — диэбиттэрэ. Онон биһиги сөбүлэһэммит, бастакынан кыттыбыппыт. Мин саныахпар, бу наһаа үчүгэйдик толкуйдаабыттар: хас биирдии саха былыргы дьиҥ сахалыы таҥаһы кэтиэхтээх. Холобур, бу бырайыакка алгыһы оҥорор, таҥыннарар дьон бары — ыаллар, бастакы кэргэннэрэ. Ол иһин ыраас, үчүгэй.
Таптыыр ырааҕы билиммэт
Мин ХИФУ-га 1 кууруһу бүтэрэн баран, Красноярскай куоракка 2 кууруска көспүтүм. Сотору балтым кэргэн тахсыбыта, онно миигин — кыыс, кэргэммин — уол өттүттэн шафердыы ыҥырбыттара. Ол күнтэн саҕалаан биһиги бииргэ буолбуппут.
Кэргэним мин үөрэхпин бүтэрэрбин үс сыл күүппүтэ. Оттон мин кэлбиппин кэннэ биир сыл буолан баран Владимир Улан-Удэҕа армияҕа сулууспалыы барбыта. Мин киниэхэ үстэ баран кэлбитим. Онон, таптыыр ыраах сылдьартан тутулуга суох.
Киһи ис санаатыттан тугу эрэ баҕардаҕына барытын кыайар эбит. Билигин номнуо кэргэниилэрбит.
Дьолбутун кистээбэппит
“Дьол чуумпуну сөбүлүүр” – диэн тыллары элбэхтэ истибитим. Ол эрэн мин итини кытта сөпсөспөппүн. Тоҕо диэтэргэ, киһи барытыттан кистии, хаххалыы сылдьар буоллаҕына олохпут сырдыга, үчүгэйэ аҕыйыыр. Төттөрүтүн, киһи дьолун бэрсэр, үөрэр-көтөр, үчүгэйи саныыр буоллаҕына олоххо барыта оннук буолар.
Ыал соҕотох уола
Биһиги бииргэ төрөөбүт иккиэбит, бырааттаахпын. Билигин кини Екатеринбург куоракка үөрэнэ сылдьар. Мин наар улахан дьиэ кэргэннэниэхпин баҕарар этим, оттон кэргэним бииргэ төрөөбүт алтыалар — биэс эдьиийдээх, бары ыаллар. Кини ыал соҕотох уол оҕото буолар. Онон, мин кини кэргэнэ буоларым улахан эппиэтинэстээх. Эдьиийдэрэ билигин Миирнэйгэ, Лиэнскэйгэ, Өлүөхүмэҕэ… — “Кыыс омук анала” — бары кэргэннэрин дойдуларыгар бааллар, үлэлии-хамсыы сылдьаллар. Уруубутугар бары кэлбиттэрэ, күүс-көмө буолбуттара наһаа үчүгэй этэ.Кыыспыт Мария билигин “Мисс Виртуальная Россия” күрэхтэһиигэ кытта сылдьар, Сахабыт сирин олохтоохторо бары биир дойдулаахпытыгар куолас биэрэн көмөлөһүөххэйиҥ. Төлөпүөҥҥүтүгэр “Индрайвер” приложениены хачайдааҥҥыт Мария Заровняева диэҥҥэ куоласпытын бука бары биэриэххэйиҥ. Бу — кулун тутар 13 күнүгэр дылы буолар. Кытаатыҥ, доҕоттоор.