2017 сыллаахха «Күлүмнүүр сиэнэ эһэтин мэтириэтин быысыбайдаата» диэн Мария Захарова туһунан сырдатан турабыт.
Онно Мария саха классик суруйааччыларын мэтириэттэрин быысыбайдыырга холонуон баҕарарын эппитэ. Мария баҕа санаатын толорон саха литературатын төрүттээбит классик суруйааччылар Алексей Елисеевич Кулаковскай — Өксөкүлээх Өлөксөй, Анемподист Иванович Софронов — Алампа, Николай Денисович Неустроев мэтириэттэрин кириэстии быысыбайдаан, VIII төгүлүн ыытыллыбыт «Быысыбайдаммыт хартыына» өрөспүүбүлүкэтээҕи быыстапка көрүүтүн түмүгүнэн «Мэтириэт» диэн номинацияҕа иккис миэстэни ылары ситистэ.
Мария Захарова быыстапкаҕа кыттыытын, мэтириэти быысыбайдыыры хаһан, хайдах саҕалаабытын инники былааннарын туһунан сурастыбыт:
— Мин бу үлэбин 2017 сылтан саҕалаабытым. Аан бастакы үлэм Василий Васильевич Никифоров — Күлүмнүүр мэтириэтэ. Кини хос-хос эһэбит буолар, онон дьиэ кэргэммитигэр хас биирдии ыалга Күлүмнүүр мэтириэтэ баар буолуохтаах диэбиппит. Балтым Уйгулаана кэргэнинээн Иванныын — Тимофеевтар дьиэ кэргэттэрэ иккиэн уруһуйдьут буоланнар Күлүмнүүр мэтириэтин уруһуйдаабыттара.
Мин уруһуйдьут буолбатахпын, онон сатыыр дьарыкпынан быысыбайдыырга быһаарыммытым. Мэтириэт уруһуйун көмпүүтэргэ баар анал бырагыраамаҕа түһэрбитим уонна схема оҥорон баран үлэбин саҕалаан, биир ыйынан бүтэрбитим.
Күлүмнүүрү оҥорон баран, саха литературатын төрүттээччилэр — Өксөкүлээх Өлөксөй, Алампа, Николай Неустроев мэтириэттэрин биирдии ыйынан быысыбайдаан бүтэрбитим. Бу иннинэ үлэлэрбин ханна даҕаны быыстапкаҕа туруорбатаҕым.
«Салгыы кимнээҕи оҥоробунуй» диэн санаа арахпакка, Саха сирин бэрэсидьиэннэрин оҥорон саҕалаабытым. Билигин Вячеслав Штыров мэтириэтин ситэрэ сылдьабын. Бүтэрдэхпинэ онтон эһиил быыстапкаҕа эмиэ кыттыам, — диэн Мария Захарова санаатын, инники былааннарын үллэһиннэ.
Надежда Ильина, «Саха сирэ» хаһыат, edersaas.ru