Ньурба, Сунтаар, Мирнэй улуустарыгар айаннааччылар Бүлүү өрүс саамай улахан салаата Марха өрүскэ (Бүлүү суола 756-с км) муоста тутулла турарын көрөн ааһаллар. Үөрэр буолуохтаахтар, саатар, манна парому күүтүө суох этибит диэн.
Александр ТАРАСОВ, «Саха сирэ» хаһыат, edersaas.ru
Муостаны тутуу 2015 сыл ахсынньытыттан саҕаламмыта уонна былаан быһыытынан 2018 сыл алтынньытыгар үлэҕэ киириэхтээх.
Бүгүҥҥү күҥҥэ өрүс икки биэрэгэр бастакы уонна алтыс тирэхтэр туруоруллубуттар. Иккис, үһүс, төрдүс, бэһис тирэхтэр ууттан быган тураллар. Билигин бэһис тирэҕи эбии өйөтөн таһааран, биэрэккэ турар алтыс тирэхтэн муоста сүнньүн ууруу саҕаланыаҕа. Салгыы төрдүс тирэҕи үрдэтэн таһааран, эмиэ муоста сүнньүн олордуохтара. Итинник бэрээдэгинэн тутуу барыаҕа. Итини тэҥэ, өрүс икки өттүгэр 200 тыһ. куб буор кутуллан, суол оҥоһуллар. 2017 сыл бүтүөр диэри муоста тимир каркааһын (4 тыһ. тонна) аҕалыахтара.
Санатар буоллахха, Марха өрүһү туоруур муоста уһуна 560 м. Итини тэҥэ, Маар үрэххэ икки сиринэн 55 м уонна 34 м уһуннардаах икки дьоҕус муоста тутуллуо.
Александр Тарасов, «Саха сирэ» хаһыат, edersaas.ru