Маргарита Игнатьева: «Уһун өрөбүллэргэ бэрэбиэркэ күүһүрүөҕэ»

Бөлөххө киир:

Бүгүн, алтынньы 27 күнүгэр, Роспотребнадзор Саха сиринээҕи управлениетын салайааччы Маргарита Егоровна Игнатьева социальнай ситимнэртэн быһа эпииргэ тахсан, буола турар балаһыанньаны сиһилии кэпсээтэ, дьон мунаахсыйар ыйытыыларыгар хоруйдаата:

— Өрөспүүбүлүкэҕэ эпидемиологическэй балаһыанньаны билиһиннэрэн саҕалыыр буоллахха, атырдьах ыйын ортотуттан үрдүк таһымнаахтык ОРВИ дьаҥа уһуйааннарга, оскуолаларга тарҕаммыта. Өрөспүүбүлүкэ сэттэ оройуонугар уонна Дьокуускай куоракка балаһыанньа уустугуран, оҕолору дьиэттэн олорон үөрэнэргэ ыыппыппыт. Онтон бастаан алын сүһүөх, онтон эксээмэннээх үрдүкү кылаас оҕолорун үөрэххэ таһаарбыппыт. Билигин даҕаны орто сүһүөх кылаас оҕолоро дьиэттэн үөрэнэллэр. Лабораторияҕа бэрэбиэркэлээн көрдүбүт: бу ааспыт нэдиэлэҕэ диэри аденовирус, кириип уонна вируснай дьаҥнар күһүҥҥү дьыл кэм уларыйыытыгар өрө турар курдук буолбут. Билиҥҥи туругунан, кирииби утары, былаан быһыытынан, нэһилиэнньэ 60%-на быһыыны ылбыт буолуохтаах. Биһиэхэ 183 тыһыынча, ол эбэтэр уопсай былаантан нэһилиэнньэ 32%-на  кирииби утары быһыыны ылбыт. Оттон өрөспүүбүлүкэҕэ кэлбит 40% кирииби утары вакцинаттан 37% киһи ылбыт.

Ил Дархан саҥа ыйааҕынан, өрөспүүбүлүкэҕэ өрөбүл күннэр биллэрилиннилэр. Ол эрээри ас, бородуукта маҕаһыыннара үлэлиэхтэрэ. Дьаарбаҥкалар, ырыынактар, атыы-эргиэн кииннэрэ үлэлэрин тохтотуохтара. Маны таһынан, өҥө оҥорор солуоннар, фитнес кулууптар, баанньыктар, сауналар, лотерея ыытар тэрилтэлэр өрүөхтэрэ. Аны 14 сааһыгар диэри саастаах оҕолор төрөппүтэ суох уопсастыбаннай сирдэргэ сылдьыбаттар. Фудкортар дьиэҕэ тиэрдэн биэрии өҥөтүн уонна тута атыылаһан илдьэ барарга эрэ үлэлиэхтэрэ. Атыы-эргиэн киинигэр баар ас маҕаһыыннара, аптекалар бары санитарнай ирдэбили тутуһан үлэлиэхтэрэ.

Сэтинньи 8 күнүттэн QR-куодунан киирии салгыы да үлэлиэҕэ. Дьиҥэ, бу алтынньы 25 күнүттэн маннык куодунан успуорт тэрилтэлэригэр сылдьыы номнуо үлэҕэ киирбитэ. Ханнык да улахан тэрээһин, бырааһынньык ыытыллара көҥүллэммэт: кэнсиэрдэр, сыбаайбалар, дискотекалар, кальян тардар сирдэр, көмпүүтэрдиир кулууптар. Уопсайынан, элбэх дьон тоҕуоруһа мустуута бобуллар. Алтынньы 20 күнүттэн тыйаатырдар, кииинэ тыйаатырдара саала 50% толорутугар QR-куодтаах эрэ дьону киллэрэр буолбуттара. Ону даҕаны, былаан быһыытынан, оҥоһуллубут репертуардарын эрэ көрдөрүөхтэрэ. Биир киһиэхэ 4 кв.м иэн сир көҥүллэнэр.

Үөрэнээччлэргэ сынньалаҥ күннэр алтынньы 30 күнүттэн сэтинньи 7 күнүгэр диэри буолуохтара. Бу кэмҥэ уһуйааннар сабыллаллар. Арай суһал үлэлээх үлэһиттэр (ЫБММ, полиция, мэдиссиинэ) оҕолоругар дьуһуурунай иитээчи үлэлиэҕэ.


Маргарита Егоровна эпиир кэмигэр киирбит ыйытыыларга хоруйдаата:

— Роспотребнадзор ханнык бэрэбиэркэлэри оҥороруй?

— Мин бу ыйытыыга ыраахтан киирэн кэпсиим. Ааспыт саас маассабай быһыыны ылыы туһунан дьаһалынан сайын от ыйыгар биир нэдиэлэ иһигэр 55 тыһыынча киһи вакцина ылбыта. Онтон атырдьах ыйыгар уонна балаҕан ыйыгар кэлэн бу таһым намтаан барбыта. Арай, бу ааспыт нэдилэттэн вакцинаны ылыы таһыма арыый үрдээтэ.

Роспотребнадзор үлэһиттэрэ уопсайа 500 эбийиэги бэрэбиэркэлээтибит. Ол курдук, уопсастыбаннай аһыыр сирдэри, успуорт тэрилтэлэрин о.д.а., хомойуох иһин, бу сылдьыбыт сирбит 80%-а санитарнай ирдэбили тутуспат эбит. Холобур, илии ыстарынар антисептик да суох сирдэрэ бааллар. Оннооҕор маҕаһыыннарга мааската суох дьону киллэрэр буолбуттар этэ. Онон, бу өрөбүллэргэ бэрэбиэркэ күүһүрүөҕэ. Куорат дьаһалтатын хамыыһыйалара полиция үлэһиттэрин кытта рейдэлиэхтэрэ.

— Оптуобустары бэрэбиэркэлиигит дуо? Наһаа элбэх киһи мааската суох  ыга симсэн айанныыр.

— Маннык көстүү баар. Тырааныспар нодзуорун салаата маны көрөр. Бу сылга мааската суох сылдьыы иһин барыта 5 886 боротокуол оҥоһуллан, дьыала суукка барбыта. Бу барыта мунньуллан, холбоон 11,5 мөлүйүөн солкуобай ыстараап буолла. Аҥаардас ааспыт нэдиэлэ түмүгүнэн 16 оптуобус санитарнай ирдэбили тутуспатын иһин ыстарааптанна.

— Кирииптэн уонна коронавирустан тэҥҥэ быһыыны ылыахха сөп дуо?

— Ылыахха сөп. Ол эрээри, эмтэри тус-туспа испириистэн туруорар наада. Өскөтүн, киһи коронавирус дьаҥыттан быһыыны ылбыт буоллаҕына, кириип утары быһыыны биир ый кэнниттэн биирдэ ылар.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0