Уус Алдан улууһун Найахы нэһилиэгэр мааны кийиит буолан олохсуйбут саха биир кэрэ Далбар хотуна, мэдиссиинэ бэтэрээнэ, СӨ доруобуйа харыстабылын туйгуна, «Найахы нэһилиэгин социальнай-экономическай сайдыытыгар кылаатын иһин” бэлиэ хаһаайката, 3 оҕо тапталлаах ийэтэ, 4 сиэн эйэҕэс эбээтэ, 4 хос сиэн эбээтэ Марфа Оконешникованан киэн туттабыт.
edersaas.ru
Марфа Афанасьевна кыһыҥҥы кэмҥэ Дьокуускай куоракка оҕолоругар баран кыстыыр. Иккис дойду оҥостубут Найахытын ахтан, саас эрдэ тиийэн кэлэр. Кини куоракка “Үһүс көлүөнэ” оскуола иһинэн тэриллибит «Ытыс ымыыта» фольклор ансаамбылыгар (салайааччы М.И.Данилова) дьарыктанар. Быйыл саас литературнай-историческай бырайыакка кыттан, «Едины в помыслах» диэн А.Е Кулаковскай-Өксөкүлээх Өлөксөйгө аналлаах тэрээһиҥҥэ Сербиянан, Болгариянан ситиһиилээхтик сылдьан кэллэ.
Саха сириттэн 35 киһилээх дэлэгээссийэ бара сырытта. Сербияҕа Өксөкүлээх Өлөксөйга аналлаах бюст, Болгария Несерб куоратыгар сэргэ туруоруллуутун сиэригэр-туомугар кытыннылар, Сербия телевидениетын сүрүн ханаалыгар уһулуннулар. Белград куоракка хаартыска быыстапкатыгар, национальнай куукунаны боруобалааһыҥҥа, ювелирнай оҥоһуктар быыстапкаларыгар кытыннылар. Саха сирин уонна Сербия талааннаахтарын кэнсиэрэ буолла. Манна «Ытыс ымыыта» ансаамбыл хомуска оонньоон үрдүк сыанабылы ылла.
Ансаамбыл соҕурууттан кэлээт даҕаны «Золотое мгновенье» самодеятельнай талааннары көрүү бэстибээлигэр кыттан, «Фольклор» көрүҥэр 2-с истиэпэннээх диплому ылла. Онтон Марфа Афанасьевна соҕотоҕун толорбут нүөмэринэн 1 истипэннээх диплому тутан, үөрэн-көтөн кэллэ.
Марфа Афанасьевна дьарыга итинэн эрэ бүппэт. Кини иистэнньэҥ бастыҥа, кыбытыгынан тигэр, сахалыы сону, сэлиэччиги кыайа тутар. Тиэргэнигэр сибэкки арааһын олордор, моонньоҕон, хаптаҕас уктара өлгөм үүнүүнү биэрэллэр. Эмчит киһи быһыытынан, сүбэ-ама биэрэр, тустаах көмөнү оҥорор. Кэтэх хаһаайыстыба тутар, сибиэһэй этинэн оҕолорун-сиэннэрин хааччыйар.
Киэн туттар, холобур оҥостор күндү киһим Марфа Афанасьевна өссө да талааныҥ арылла турдун, саҥаттан саҥа кыайыылар, ситиһиилэр кэлэ турдуннар, оҕолоргор-сиэннэргэр, чугас дьоҥҥор үөрүүнү үксэтэ сырыт диэн баҕарабын.
Галина ЧУКРОВА, “Саха сирэ”, edersaas.ru cайтка анаан