Бүгүн, 2020 сыл муус устар 3 күнүгэр, РФ үтүөлээх, Саха норуодунай артыыската, Мэҥэ Хаҥалас улууһун уонна II Наахара нэһилиэгин бочуоттаах олохтооҕо Марфа Петровна Колесова-Расторгуева төрөөбүтэ 70 сылын туолла.
Кини аата Саха сиригэр эстраднай уонна сииркэ ускуустубатын төрүттэниилэрин уонна сайдыытын кытта үйэлэргэ ыкса ситимнээх.
«Бу сир үрдүгэр букатын кэлбит суох. Сарсын биһигини туох күүтэрин ким даҕаны билбэт. Биһиги барыахпыт, оттон Сииркэбит хаалыаҕа! Ити курдук биһиги Сергейдиин эмиэ дьон өйүгэр-санаатыгар хаалыахпыт«, — диэбитэ биирдэ кини үбүлүөйдэээх кэнсиэрин иннинэ.
Норуот тапталлаах ырыаһыта. Саха комсомуолун бириэмийэтин лауреата. Арассыыйа цирковой диэйэтэллэрин сойууһун чилиэнэ. «Учууталлар учууталлара».
Марфа Петровна, ол гынан баран, бастатан туран – артыыс. Кини сыанаҕа тахсан олус истиҥник кэрэ, күүстээх куолаһынан сахалыы да, нууччалыы норуодунай да ырыалары ыллыырын, хомуска оонньуурун, канаатынан хаамарын, жонглердуурун көрөөччү умнубат.
Хайдах курдук иэйиилээхтик Валерий Ноев, Ольга Иванова, Виталий Андросов, Галина Шахурдина, Алексей Егоров, Сергей Расторгуев ырыаларын көрөөччүлэригэр тиэрдэрэй?!… Тыыннаах муусука! Оттон хас кэнсиэр аайы кини көрөөччүтүн кытта истиҥ кэпсэтиитэ өйгө-сүрэххэ иҥэн хаалбыта чахчы.
Бүгүн, “Саха” НКИХ телеханаалыгар 18ч. 30 мүн. Иван Кривогорницын «Эhиги миигин өйдүөхxүт» диэн Марфа Колесова сырдык аатыгар аналлаах документальнай киинэтин көрөөрүҥ.
Аҕа дойду Улуу сэриитин бэтэрээнин оҕото буолан, кини ордук бэтэрээннэргэ сылаас-сайаҕас сыһыанын, хас сыл аайы ыам ыйын 9 күнүгэр СахаСииркэ скверигэр кинилэргэ дьиҥнээх бырааһынньыгы тэрийэрин ама ким умнуой?!
Тапталлаах сииркэтин кэлэктиибигэр кини ийэ, эбээ кэриэтэ этэ. Кини туох баар сатабылын, билиитин-көрүүтүн, эрчимин, сүрэҕин сылааһын, талаанын көрөөччүтүгэр уонна циркэтигэр анаабыта.
edersaas.ru