Марат Николаев спортсменын таһынан, араас күрэхтэһиилэри тэрийэр. Хас да сыллааҕыта ММА-ҕа турнир тэрийэн, кырачаан Кирилл Грищенко эмтэнэригэр 100 тыһ. харчынан көмөлөспүтэ. Кини олоҕун, дьарыгын, үлэтин туһунан санаатын үллэстэр.
Айтана Аммосова, «Саха сирэ» хаһыат, https://edersaas.ru
— Мин М.К. Аммосов аатынан ХИФУ Физкултуура уонна спорт институтун устудьуонабын. Ону таһынан кэтэхтэн тыа хаһаайыстыбатын техникумугар юрист идэтигэр үөрэнэбин. Күн аайы университекка тиийэн, атын оҕолор курдук паартаҕа олорон үөрэнэр кыаҕым суох, ол иһин анал графигынан үөрэнэбин. Төрүөхпүттэн «несовершенный остеогенез» диэн диагнозтаахпын, кыаҕым таһынан хамнаннахпына, уҥуохтарым тостоллор. Ийэм, эбэм, быраатым уонна балтым буолан Дьокуускайга олоробут. 2014 сыллаахха Владивосток куоракка үөрэнэ сырыттахпына, аҕам суох буолбута. Онон Дьокуускайга төттөрү төннүбүтүм. Аҕам спорт эйгэтигэр сыһыарбыт киһим буолар. Кыра эрдэхпинэ гимнастиканан дьарыктыырын өйдүүбүн. Спордунан сөбүлээн дьарыктанарым таһынан, былырыыҥҥыттан Ыччат парламенын чилиэнэ буолбутум. Футболу уонна тустууну интэриэһиргиибин. Соҕотоҕун тустууга аан дойду чөмпүйэнээтин көрө диэн Узбекистаҥҥа бара сылдьыбытым. 2011 сыллаахха «Якутия» футбол кулуубун сүгүрүйээччилэрин лидерэ этим. Ол быыһыгар, «Спорт Якутии» хаһыакка корреспонденныырым. Онно хаһыакка кэлээскэнэн сүүрүү буоларын туһунан биллэрии аахпытым уонна кыттарга санаммытым.
«Урааҥхай» боотурабын
«Урааҥхай» спорт кулуупка дьарыктанабын, араас тэрээһиннэри ыытарга көмөлөһөбүн. Бу кулуупка киириэххин баҕарар буоллаххына эт-хаан, өй-санаа тургутуутун ааһаҕын. Ону ааһан, 2014 сыллаахха боотур аатын ылбытым. Сорох дьон «урааҥхайдары» националистар дии саныыллар. Биһиги спордунан дьарыктанар кулууп буолабыт, манна атын омук уолаттара, кыргыттара эмиэ эрчиллэллэр. «Урааҥхайдар» кими да үөхпэттэр, охсуспаттар. Биир санаанан салайтарар хас да киһи түмүстэ даҕаны, дьон тута националистар диэн быһааран кэбиһэр. Оннук буолбатах. Биир бэйэм маннык өйдөбүллэр утары охсуһабын. Дьоппуоннарга – самурайдар, Англияҕа – рыцардар баалларын курдук, сахаларга – урааҥхайдар бааллар диэн өйдүөхтээхпит. Уопсайынан, сахалар бэйэ-бэйэбитин баттаһабыт, сиилэһэбит аҕай. Холобур, спортсменнарбыт күрэхтэһиигэ хоттордохторуна үөҕүү, саҥарыы-иҥэрии бөҕө буолабыт. Оттон атын омуктар бэйэлэрин дьонун тула түмсэ түһэллэр. «Биир ньыгыл, сомоҕо буолуохтаахпыт» диэн өйдөбүл баар буолуохтаах, бу иһин мин үлэлиибин.
Ил Дархан өйүүр
«Урааҥхай» спорт кулуубун чилиэттэрэ буоламмыт Ил Дархаммытын Егор Афанасьевич Борисовы өйүүбүт. Былырыын панкратиоҥҥа Норуоттар икки ардыларынааҕы турниры тэрийбиппит. Онно Ил Дархан кэлэн өйөөбүтэ, биһиэхэ улахан чиэс буолар. Хас эмэ сыллар тухары дьарыктанар саала арендалыыр этибит. Билигин Егор Афанасьевич көмөтүнэн, «Модун» спорт киинигэр туспа саалаланныбыт. Ил Дархаммыт тула түмсүөхтээхпит. Бары бэйэ-бэйэбитин өйүөхтээхпит, өйдүөхтээхпит, оччоҕо эрэ норуот сайдыа дии саныыбын.
Доҕоттордоох буолан
Спорт миэхэ дьиҥнээх доҕоттору бэлэхтээтэ. Ыарахан кэмҥэ дьиҥнээх доҕор, атас ким буолара биллэр. «Урааҥхай» кулууп уолаттарыттан ким эмит ыарахаҥҥа түбэстэҕинэ, тута көмөлөһө сүүрэбит: харчынан, аһынан, таҥаһынан… Бу сотору Сахалиҥҥа доҕотторбут Уһук Илин турнирыгар күрэхтэһэ барыахтаахтар, онно бары көмөлөһөн, харчы бырахсан, оннооҕор этинэн, хортуоппуйунан хааччыйан ыытаары сылдьабыт. Сынньалаҥҥа, дьарыкка миигин доҕотторум куруук илдьэ сылдьаллар, иллэҥ кэммитин бииргэ атаарабыт. Доҕотторбор ситиһиилэри, саҥа чыпчааллары баҕарабын.
Айтана АММОСОВА, «Саха сирэ» хаһыат, https://edersaas.ru
Хаартыскалар Интэриниэт ситимиттэн туһанылыннылар.
[vc_video link=»https://www.youtube.com/watch?v=jBS4AsHRChw» title=»Марат Николаевтыын интервью. Виталий Данилов видеота.»]