Марат Шамьюнов: “Эрэгийиэннэр икки ардыларынааҕы семинардар туһалара улахан”
РФ Уһук Илинин уонна Арктика министиэристибэтэ Саха сирин инвестиционнай бырайыактарыгар, социальнай-экономическай сайдыытыгар өрүү көмөлөһөргө бэлэм. Бу туһунан Уһук Илин уонна Арктика сайдыытын миниистирин солбуйааччы Марат Шамьюнов бүгүн Үп министиэристибэтин сэминээригэр иһитиннэрдэ.
Бүгүн, балаҕан ыйын 16 күнүгэр, Дьокуускайга Үп министиэристибэтин Уһук Илиннээҕи семинар-мунньаҕа буолан ааста. Мунньахха РФ үбүн министиэристибэтэ, Уһук Илин эрэгийиэннэрин бэрэстэбиитэллэрэ, Саха сирин улуустарын үбүлээһин эйгэтигэр үлэлиир исписэлиистэрэ кэлэн кытыннылар.
– Бу семинар аҥаардас Үп министиэристибэтин эрэ үлэһиттэригэр буолбакка, үбүлээһин эйгэтигэр үлэлии сылдьар бары исписэлиистэргэ барыларыгар туһуланар. Мунньахха оройуоннартан бүддьүөккэ үлэлэһэр управление салайааччылара кэлэн кытыннылар, уопут атастастылар. Мин санаабар, ханнык баҕарар эйгэҕэ эрэгийиэннэр икки ардыларынааҕы сэминээрдэр исписэлиистэр уопут атастаһалларыгар төһүү буолаллар. Биһиги министиэристибэбит бу семинарга эмиэ кыттар, – диэн бэлиэтиир Марат Маратович.
Кини иһитиннэрбитинэн, билигин аан дойду үрдүнэн уларыйыы-тэлэрийии буола турар кэмигэр бастакы уочарат үп-харчы, бүддьүөт эйгэтэ оҕустарар.
– Сэминээр үбү-харчыны көдьүүстээхтик туһаныыга ананна. Кэлиҥҥи сылларга аан дойду үрдүнэн үгүс уларыйыы буола турар. Онно барытыгар бүддьүөт эйгэтэ улахан уларыйыыны көрсөр. Уһук Илин уонна Арктика сайдыытын министиэристибэтэ бу федеральнай уорукка киирэр эрэгийиэннэргэ көмө-тирэх буолар сыаллаах тэриллибитэ. Саха сирэ быйылгы Илиҥҥи экономическай пуорумҥа бары эрэгийиэннэртэн саамай элбэх үптээх дуогабардары баттаспыта. Биһиги министиэристибэбит инвестицияны киллэриигэ үлэлэһэрин таһынан бырайыактары олоххо киллэриигэ, эрэгийиэннэр социальнай-экономическай сайдыыларыгар быһаччы үлэлэһэр, ол иһигэр Саха сирин инвестиционнай бырайыактарыгар, социальнай эйгэтигэр эмиэ, – диэн этэр суруныыстары кытары көрсүһүүтүгэр.
Аграфена КУЗЬМИНА