Ахсынньы 15 күнүгэр СӨ Үлэ, социальнай көмүскэл министиэристибэтин иһинэн тэриллибит Ыччат сэбиэтэ “Үтүө санаа марафона” аахсыйаны саҕалаата. Бу аахсыйаны Арассыыйаҕа социальнай сулууспа тэриллибитэ 100 сылыгар анаатылар.
Министиэристибэ эдэр үлэһиттэрэ ДьГСХА устудьуоннарын кытта Өрөспүүбүлүкэтээҕи кырдьаҕастар, инбэлииттэр интэринээт-дьиэлэригэр баран кэнсиэртээн, эҕэрдэлээн кэллилэр.
Бу аахсыйаҕа эдэр дьон кытталлар. Кырдьаҕас, кыаммат дьоҥҥо, инбэлиит оҕолорго, ыарахан балаһыанньаҕа түбэспиттэргэ көмөлөһөр сыаллаахтар. Ону тэҥэ эдэр дьону аһыныгас буоларга, үтүө санааны тарҕатарга үөрэтэллэр.
“Тэбиэн саҕа хара санаатааҕар, түөн саҕа үтүө санаа быдан ордук” диэн өс хоһооно этэринии, кыра да үтүө дьыаланы оҥордоххуна, бэйэҥ олоххун, тулалыыр эйгэҕин тупсараҕын. Биллэн турар, үүнэр көлүөнэ ыччаппытын үтүө санааҕа эмиэ үөрэтиэххэ наада. Оттон кырдьаҕас, кыаммат дьон кыракый да болҕомто сыыһыттан үөрээхтиир буоллахтара.
Бу аахсыйаҕа кыттыан баҕалаахтар 34-16-35 нүөмэргэ эрийэн (Николаева Мария), эбэтэр nikolaevamn@sakha.gov.ru электроннай почтаҕа суруйан билсиэххитин сөп.
Ангелина Васильева, “Саха сирэ” хаһыат, edersaas.ru