Саха сирин норуоттарын спортивнай оонньууларын чэпчэки атлетикаҕа биир интэриэһинэй көрүҥүнэн марафоҥҥа сүүрүү буолла. Бу күрэхтэһии туһунан бэйэтин санаатын СӨ физическэй култуураҕа үтүөлээх үлэһитэ, чэпчэки атлетикаҕа өрөспүүбүлүкэ элбэх төгүллээх чөмпүйүөнэ Афанасий Петрович Илларионов маннык үллэстэр.
— Спорт управлениетын кытта оонньуу саҕаланыа биир ыйа иннинэ Аммаҕа кэлэн, марафон трассатын көрөн, мээрэйдээн барбыппыт. Былаан быһыытынан, Амма киин уулуссаларынан сүүрдүөхтээх этибит да, ГАИ-лар көҥүллээбэтилэр. Онон Спортивнай уонна Курашов аатынан уулуссаларын 15-тэ эргиттибит. Онно суола бетон буолбатах буолан, күүстээх ардах кэнниттэн барыта бадараан буолан хаалла. Ол да буоллар, сүүрүүнү ардах аннынан ыыттыбыт. Ол биллэн турар, спортсменнарга ыарахан. Барыта 55 киһи, дьахталлар уонна эр дьон кытыннылар. Кинилэри хайгыахха эрэ сөп.
Манна марафон бастыҥнара Вячеслав Громов, Альберт Варламов, Василий Лукин, Василий Спиридонов бааллара. Онуоха кэнники километрга тэтимин лаппа эбэн биэрбит Альберт Варламов (Таатта) бастаата. Кини бириэмэтэ 2 чаас 40,16 мүнүүтэ. Иккис миэстэни Вячеслав Громов (Хаҥалас) ылла. Бириэмэтэ — 2.41,32. Бу наһаа куһаҕана суох көрдөрүү. Альбертаах Вячеслав дистанция былаһын тухары хардары-таары инникилии сырыттылар. Онон сүүрүү эрийсиилээх буолла.
Үһүс бириистээх миэстэни Намтан төрүттээх Айсен Васильев (Бүлүү) ылыыта соһуччу соҕус буолла. Уопуттаах Василий Спиридонов төрдүс миэстэлэннэ. Оттон өрөспүүбүлүкэ икки кэнники сылга марафоҥҥа чөмпүйүөнэ Василий Лукин табыллан сүүрбэтэ.
Дьахталларга Сардаана Трофимова бастыыра эрдэттэн биллэр этэ. Иккис миэстэни Марфа Троева ылла. Кини үс-түөрт эргиир инникилии сылдьыбыта.
Марафоҥҥа, хоту улуустар спортсменнара көхтөөхтүк кыттыбыттарын бэлиэтиэм этэ.
Петр Павлов.