Манна тоҕус сэрии бэтэрээнэ олорбута…

Бөлөххө киир:

Аҕа дойду Улуу сэриитин сылларыгар II Тыыллыма нэһилиэгиттэн 79 бастыҥ ыччат фроҥҥа барбыта, саа-саадах тутан, дойдубутун фашистартан көмүскээбитэ. 51 саллаат сэрии хонуутугар дьоруойдуу охтубута, дойдутугар 28 киһи тыыннаах эргиллэн кэлэн, эйэлээх олоҕу тутуспута.

Кинилэр ортолоругар Хаатылыматтан төрүттээх буойуттар ааттарын ааттыыбыт: “Кыһыл Сулус” уонна “Албан Аат” III истиэпэннээх уордьаннар кавалердара Николай Семенович  Ксенофонтов,  “Кыһыл Сулус”, “Албан Аат”  уордьаннар кавалердара Гаврил Иванович Михайлов, “Кыһыл Сулус” уордьаннаах Ефим Семенович Ефимов, “Кыһыл Сулус” уордьаннаах Николай Михайлович Игнатьев-II, Аҕа дойду сэриитин II истиэпэннээх уордьанын, “Хорсунун иһин”, “Германияны кыайыы иһин” бойобуой мэтээллэр кавалердара, сэрии инбэлиитэ, үлэ фронугар Алдан аэропордун тутуу кыттыылааҕа Иван Иванович Григорьев, “Албан Аат” уордьан кавалера Семен Осипович Никифоров, уо.д.а. Хаатылыматтан төрүттээх сэрии бэтэрээнэ Дмитрий Семенович Михайлов Дьокуускайга олорор.

Хаатылыма – II Тыыллыма нэһилиэгэ, урут “Молотов” холкуос киинэ, “Ленин” сопхуос  отделениета эрдэҕинэ,  нэһилиэнньэтин ахсаана, биллэн турар, элбэх этэ. Билигин манна 131 киһи олорор, оҕолорго алын сүһүөх оскуола-саад үлэлиир.

– Быйыл Улуу Кыайыы 75 сылынан  бөһүөлэк саамай көстүүлээх сиригэр сэрии бэтэрээннэригэр аналлаах искибиэр оҥордубут. Баһылыкпыт Ким Попов идиэйэтинэн, Хаатылымаҕа олорбут, үлэлээбит  9 бэтэрээн  дьиэтин истиэнэтигэр мемориальнай билиитэлэри бэлэмнээтибит. Онно бэтэрээннэр оҕолоро, аймахтара кытыннылар, – диир нэһилиэк дьаһалтатын социальнай боппуруостарга сүрүннүүр исписэлииһэ  Анастасия Степанова.

Билигин Хаатылыма уулуссаларыгар, сэрии бэтэрээннэрэ олорбут дьиэлэригэр, Ийэ дойдуларын көмүскүүр уоттаах сэриигэ дьоруойдуу кыргыспыт буойуннар ааттарын үйэтитэр мемориальнай билиитэлэр биир-биир туруоруллан иһэллэр.

Ол курдук, атырдьах ыйын 25 күнүгэр  нэһилиэк дьаһалтата, хорсун буойун төрөппүт оҕолоро, сиэннэрэ, хос сиэннэрэ  сэрии, үлэ бэтэрээнэ ГРИГОРЬЕВ Иван Иванович олорбут дьиэтигэр тапталлаах аҕаларын, эһэлэрин үйэтитэр мемориальнай дуосканы ыйаатылар.

Хаатылыма төрүт олохтооҕо Иван Иванович Григорьев 5 кыыс, 2 уол оҕолордоох, элбэх сиэннэрдээх. Кини холкуос, сопхуос төһүү үлэһитэ, байанайдаах булчута этэ.  Аҕа дойду Улуу сэриититтэн уордьаннаах, мэтээллэрдээх эргиллэн кэлбитэ.  “Хорсунун иһин” бойобуой мэтээл мээнэ бэриллибэтин өйдүүбүт. Чопчу оҥоһуллубут дьоруойустуба иһин туттарыллар дьоһуннаах наҕараада буолар. Хорсун буойуну, уоттаах сэрии бэтэрээнин, бойобуой араанньылаах дойдутугар кэлбитигэр, аны үлэ фронугар Алдан аэродромун тутууга ыыппыттара. Манна кини, ханна да буоларын курдук, эмиэ хорсун үлэһитин көрдөрбүтэ.

Мэҥэ-Хаҥалас оройуонун бочуоттаах олохтооҕо Иван Иванович ГРИГОРЬЕВ төрөөбүт улууһа, нэһилиэгэ, дойдута Хаатылыма сайдарын туһугар үтүө суобастаахтык, тахсыылаахтык, биир дойдулаахтарыгар үтүө холобур буолар гына  үлэлээн-хамсаан олорбута.

Хорсун буойун олоҕо оҕолоругар, сиэннэригэр, хос сиэннэригэр салҕанар. Биир дойдулаахтара үтүө киһи, тахсыылаах үлэһит, уоттаах сэрии бэтэрээнэ Иван Иванович Григорьев  аатын умнубаттар.

Татьяна МАРКОВА.

 

+1
0
+1
0
+1
0
+1
0
+1
0
+1
0
+1
0