Бүгүн Горнай улууһугар Бэрдьигэстээххэ умнуллубат бэлиэ күн буолла.
Ол курдук, «2019-2025 сылларга гражданнары хаарбах дьиэттэн көһөрүү» өрөспүүбүлүкэтээҕи аадырыстаах бырагырааманан сэлиэнньэҕэ тутуллуохтаах саҥа түөлбэҕэ элбэх кыбартыыралаах дьиэ атаҕа түһэрилиннэ.
Үөрүүлээх чааска СӨ Бырабыыталыстыбатын бэрэссэдээтэлин бастакы солбуйааччы Кирилл Бычков, «Сахаэнерго» ААУо генеральнай дириэктэрэ Гаврил Алексеев, Горнай улууһун баһылыга Никита Андреев, СӨ судаарыстыбаннай сакаасчыт сулууспатын генеральнай дириэктэрэ Петр Кушкирин уо.д.а. кыттыыны ыллылар.
Күүтүүлээх, улахан эппиэтинэстээх тэрээһин үгэс быһыытынан Алгыстан саҕаланна. Салгыы СӨ Бырабыыталыстыбатын бэрэссэдээтэлин бастакы солбуйааччы Кирилл Бычков тэрээһиҥҥэ мустубут дьону-сэргэни эҕэрдэлээтэ уонна Горнай улууһа социальнай-экэнэмиичэскэй сайдыыга, нэһилиэнньэ олоҕун таһымын үрдэтиигэ кэнники сылларга иннин диэки улахан хардыыны оҥорбутун бэлиэтээтэ.»Саха сиригэр түөлбэ дьиэлэрин тутууга саамай бастакы атах түһэрилиннэ. Маныаха чуо бу сиртэн саҕалаан, былааннаммыт, ыйааһын хараҕар ууруллан көрүллүбүт уонна толкуйдаммыт өрөспүүбүлүкэҕэ туспа түөлбэнэн дьиэлэри тутуу үлэлэрэ саҕаланаллар. Тутуллар дьиэни-уоту сэргэ, таһынааҕы сиригэр-уотугар дьоҥҥо табыгастаах буоларын курдук, былааҥҥа улахан болҕомто ууруллуо. Былааннар толорулланнар, өрөспүүбүлүкэ хас биирдии олохтооҕо тупсаҕай дьиэҕэ олорор кыахтанарыгар эрэнэбин«, — диэн бэлиэтээтэ бастакы вице-премьер.
Бэлиэтээн эттэххэ, «Олорор дьиэ уонна куорат эйгэтэ» национальнай бырайыагы олоххо киллэрии чэрчитинэн, 2021 сылга түһүмэхтэринэн ыытыллар үлэнэн билигин 700-тэн тахса киһи олорор хаарбах дьиэтиттэн(уопсайа 8 114 кв. м ) көһөрүллүө. Оттон Горнай улууһугар 2025 сыл түмүктэниэр диэри, билиҥҥи туругунан 1 647 киһи олорор хаарбах туруктаах 91 дьиэтин (барыта 19 тыһ. тахса кв.м. иэн) көтүрүөхтэрэ.
СӨ Ил Дархан уонна Бырабыыталыстыба пресс-сулууспата
Хаартыска: sakha.gov.ru