Борис Неустроев-Мандар Уус “Моҕол ураһа” барыла тылга эмиэ сыһыаннаах диэн бэлиэтээн эттэ.
— Мин аныгы көлүөнэ дьон ыччаттара кэҥиэхтэрин баҕарабын. Илиҥҥи омуктары кытары алтыһарбыт элбээн иһэр. Онон аныгы оскуола оҕото хайаан даҕаны нуучча, саха тылынан муҥурдаммакка, илиҥҥи омуктар тылларын кытта билэрэ буоллар диэн баҕарабын. Дьиҥинэн, киһи төрөөбүт тылын үчүгэйдик билэр буоллаҕына, төрөөбүт тылга таптал диэн үөскүүр. Оттон тылга таптал үөскээтэҕинэ, оҕо нууччалыы дөбөҥнүк саҥарар. Оттон нууччалыы саҥардаҕына, ханна баҕарар тиийэр. Итинтэн ситимнэнэн барыта тахсан кэлэр.
Ураһабыт, этэргэ тылы, бэйэбит уран тылбыт курдук. Биһиги омук быһыытынан духуобунай культуралаахпыт, төрөөбүт тыллаахпыт уонна материальнай культуралаахпыт. Холобур, билигин этэргэ дылы, Эйфель башнятын көрөн туран, киһи ханна тиийбитин билэр буоллаҕа. Мин Кытай Улуу истиэнэтигэр тиийэн тураммын, эмиэ ханна тиийбиппин билэрим чуолкай. Дьэ, бу буолар, материальнай культура диэн. Ол омукка барытыгар баар.