Мэлдьэхсигэ РФ, СӨ мас тардыһыытын маастара, элбэх түһүлгэ кыайыылааҕа, биир дойдулаахпыт Владимир Яковлевич Шарин, нэһилиэккэ мас тардыһыытын сайыннараары, Мооруктан СӨ үтүөлээх тириэньэрин Николай Иванович Бояровы ыҥыран аҕалан, оҕолору маска дьаныардаахтык дьарыктатан, ситиһиилэр кэллилэр.
Быйылгы, Горнай улууһугар ыытыллан, түмүктэнэн эрэр 21-с спортивнай “Манчаары оонньууларыгар” Мэлдьэхситтэн ыччат дьоммут мас тардыһыытыгар, хотугу оонньууларга бэркэ кытыннылар.
Ол курдук, академик Афанасий Чугунов аатынан Мэлдьэхси орто оскуолатыттан оскуола тириэньэрэ, СӨ спордун маастара Павел Петрович Кычкин иитиллээччилэриниин Эдик Бояровтыын, Гарик Павловтыын Бэрдьигэстээххэ тиийэн, Саха сирин күүстээх спортсменнарыныын күөн күрэстэстилэр. Күрэхтэһии түмүгүнэн 60 кг ыйааһыҥҥа тириэньэр Павел Кычкин 3-с миэстэни, оскуола 11-с кылааһын үөрэнээччитэ Эдик Бояров 2-с миэстэни ылары ситистилэр.
Мэлдьэхси ыччаттара — университет аатыттан кыттыбыт Лия Плотникова дьахталларга мас тардыһан, 3-с бириистээх миэстэҕэ таҕыста, оттон Хотугу оонньууларга үөрэнээччилэр ортолоругар Хара лицейин 10-с кылааһын үөрэнээччитэ Денис Колесов абсолютнай чөмпүйүөн аатын сүктэ. Мэлдьэхси оскуолатыгар үөрэнэр сылларыгар кинини СӨ спордун маастара Иннокентий Степанов уһуйбута, дьарыктаабыта. Денис салгыы Хара лицейигэр дьарыктанар, тириэньэрэ Руслан Яковлев. Уолбут сүүрүүгэ 2-с миэстэ, аркааҥҥа 2-с миэстэ, сүгэни ыраах быраҕыыга 3-с миэстэлэри ылла. Абсолютнайга, үөһээ бэлиэтээбиппит курдук, 1-кы миэстэни ылла!
Ити курдук, ыччаттарбыт утумнаахтык дьарыктананнар, тириэньэрдэр сыралаах үлэлэрин түмүгүнэн, ситиһиилэр өссө да кэлэ туруохтара диэн эрэнэбит.
Надежда АНДРОСОВА,
Мэлдьэхси, Мэҥэ-Хаҥалас улууһа.