БИЭТЭС БИЛЭЭХЭП: “Манчаарыбыт” атын омук оонньууларыгар кубулуйбатар ханнык

Саха сиригэр сайын барахсан – үтүө кэм. Итиитэ эрэ буолуо дуо, арааһынай ыһыаҕа, успуордун оонньуута олох атах тэпсибитинэн кэлэ тураллар.

Абаккам, арыый эдэрим эбитэ буоллар, массыынаҕа тиэллэ сылдьан улууһу барытын кэрийбэхтиэм этэ. Аныгы суоллар да үчүгэйдэрэ, уруккуга холоонноох буолуохтара дуо.

Ол эрээри айаны кыайбат буолан, араас оонньуу, күрэхтэһии саҕаланна да, күнү быһа тэлэбиисэри маныыбын. Эмээхсиним үрдүбэр кэлэн, аһаа  эбэтэр утуй диэн сарылаатаҕына, биирдэ өндөйөбүн диэххэ айылаах. Хата бу “Манчаары оонньууларыгар” үөлээннээҕим Дьөгүөр кэлэн, иккиэн күннээтибит. Кини былыргыта ыспарсымыан бэрдэ этэ буоллаҕа, аҕыйах “Манчаарыга” кыттыбыт киһи. Бэл хапсаҕайга биирдэ мүһэ ылан турардаах. Онон бэйэтин адьас исписэлиис курдук сананар. Мин “любитель” буоллаҕым дии, онон мээнэ-мээнэ куолулаабаппын. Арай ат сүүрдэҕинэ ыт хаалсыбат дииллэринии, киһим саҥарыа эрэ кэрэх, түсүһэн иһэбин.

Арай биир күрэххэ адьас саха улууһугар хайдах да төрүүр да, олохсуйан эрчиллиэ да суох көрүҥнээх киһи  киирэн күрэхтэстэ ээ. Биһиги дьоммутун адьас хаһыытаппытынан кэннигэр хааллартаан кэбистэ. Мин эмиэ улуустаах киһи, дьоммор ыалдьыбыт уоһум оҥойбута оҥойбутунан хаалла.

“Бэйи, ити хайаларай? Ити улууска хаһааҥҥыттан олорор?” – диэн успуорка барыны бары билэр Дьөгүөртэн ыйыталаһабын.

“Ээ, ити легионердар диэн ааттаналлар. Харчыга атыылаһыллан кэлэр дьоннор. Эбиитин, көр, өрөспүүбүлүкэ харчытын туура тутан барда буолбат дуо? Бэйэбит дьоммут эрэйдээхтэр кыһыны быһа эрчиллэн-эрчиллэн баран, таах хаалан хааллылар, – Дьөгүөр кыһыытыттан ытыһын сууралаамахтаата. – Урут биһиги саҕана итинник суох этэ. Чиэһинэйдик, ким төһө кыахтааҕынан киирсэрбит. Ол саҕана үлэ быыһыгар бириэмэ булан спортсаалаҕа, саас-сайын айылҕаҕа тахсан эрчиллэрбит. Билигин сылы быһа успуордунан дьарыктанар дьон анаан-минээн эрэгийиэннэри кэрийэ сылдьан, харчыга ким баҕалаахха кыайыыны тэбэн биэрэр идэлэммиттэр. Итини тохтотуохха наада”.

Эчи доҕор, сайдыбыппыт сүрдэммит дии. Итиччэтигэр саха олимпиадата диэн күүркэтиллэ соҕус ааттанар оонньууларбыт олох да харчыга ыҥырыллан кэлэр анал дьарыктаах дьон күрэхтэһэр оонньууларыгар кубулуйан эрэр эбит…