Үөһээ Бүлүүгэ ыытылла турар сүүрбэһис үбүлүөйдээх “Манчаары оонньуулара” күрэхтэһии чаҕылхай түгэннэрин Россия “Матч” диэн спорду анаан сырдатар ханаалыгар көрүөхпүт.
Москваттан биллиилээх суруналыыс, спортивнай комментатор Владимир Иваницкай салалтатынан түөрт киһилээх бөлөх кэлэн, оонньуулары уста сылдьар. Кини бэйэтэ көҥүл уонна “классическай” дэнэр гректии-римнии тустуулары, дзюдону, самбоны, быһата, күүстээхтэр күөн көрсүһүүлэрин сырдатыыга идэтийэрин спорду сэҥээрээччилэр үчүгэйдик билэллэр. Саха сиригэр ыытыллыбыт Россия көҥүл тустууга чемпионаттарыгар мэлдьи кэлэн барааччы.
Владимир Иваницкай Нам түһүлгэтигэр сылдьан, бөҕө-таҕа уолаттар сымара тааһы сүүһүнэн миэтэрэҕэ диэри көтөҕөн илдьэллэрин сөҕө-махтайа көрдө. Ыалдьыппыт Манчаары оонньууларын түгэннэриттэн тиһэн, саха эти-хааны сайыннарар төрүт көрүҥнэрин сиһилии кэпсиир биир-икки биэриини бэлэмнээн таһаарар былааннааҕын иһитиннэрдэ. Хапсаҕайга балачча миэстэни биэрэр буолуохтаах. Онон, мантан инньэ “Матч” ханаал биэриилэрин бырагырааматын кэтэһэр-манаһар аатыгар барабыт.
Улахан суруналыыс Үөһээ Бүлүү ытык сиригэр түбэһиэхчэ үктэммэтэ. “Сахамедиа” АУо инженерэ, оператор идэлээх Евгений Петров В.Иваницкайы дойдутугар ыҥыран аҕалан, арыаллыы, тэҥҥэ үлэлэһэ, киинэҕэ устуһа сылдьар.
Василий НИКИФОРОВ, https://edersaas.ru
Ааптар хаартыскаҕа түһэриилэригэр: “Матч” спорт ханаалын эрэдээктэрэ Владимир Иваницкай биир идэлээҕэ, доҕоро Евгений Петровтуун уонна тааһы көтөҕүүгэ бастаабыт Любомир Николаевтыын.