Бэрдьигэстээххэ СӨ Бырабыыталыстыбатын бэрэссэдээтэлин солбуйааччы, XXI «Манчаары оонньууларын» тэрийэр хамыыһыйатын бэрэссэдээтэлэ Сергей Местников, СӨ Ил Дарханын сүбэһитэ Георгий Балакшин үлэлээтилэр.
Тэрийэр хамыыһыйа бөлөҕө, бастатан туран, тутулла турар эбийиэктэри көрдө, миэстэтигэр үлэһиттэри көрүстүлэр, санааларын иһиттилэр. Салгыы улуус дьаһалтатын аактабай саалатыгар сүбэ мунньах тэрилиннэ. Манна СӨ тутуу, физическэй култуура уонна успуорт, суол хаһаайыстыбатын уонна тырааныспарын, энергетика уонна дьиэ-уот коммунальнай хаһаайыстыбатын министиэристибэлэриттэн миниистирдэри солбуйааччылар, эппиэттинэстээх тэрилтэлэр, управлениелар салайааччылара кыттыыны ыллылар. Сүбэ мунньах иннинэ Сергей Местников, улуус баһылыга Никита Андреев далааһыннаах тэрээһин кэмигэр хаачыстыбалаах сибээс өҥөтүнэн хааччыйарга үлэлиэһиэхтээх “Рубинет” ХЭТ дириэктэрин Евгений Сысоевы кытта бииргэ үлэлэһэргэ сөбүлэҥ түһэристилэр.
– Бэрдьигэстээххэ ыытыллыахтаах «Манчаары оонньууларын» хайысхатынан үлэ-хамнас күргүөмнээхтик бара турар. Сүрүн эбийиэктэри тутуу үлэтэ былаантан хаалбат. Стадиону бэс ыйын 30 күнүгэр диэри туттарыахтаахтар. Билигин түмүктүүр түһүмэххэ таҕыстылар диэххэ сөп.
Спортсменнар, ыалдьыттар түһэр сирдэрин-уоттарын көрдүбүт. Бэрдьигэстээххэ “Хаарбах туруктаах дьиэттэн көһөрүү” бырагырааматынан тутулла турар дьиэлэри, спортивнай тэрээһининэн сибээстээн, эрдэ киллэрэргэ быһаары ылыммыппыт. Бэрдьигэстээх иһигэр тупсаран оҥоруу хайысхатынан элбэх үлэ ыытыллара күүтүллэр. Көҕөрдүү, эбийиэктэри кырааскалааһын, көтүрүү, бөҕү-саҕы хомуйуу барыан наада. Нэһилиэк кэрэ көстүүлэнэригэр олохтоохторго эрэлбит улахан, – диэн Сергей Местников санаатын үллэһиннэ.
– Билиҥҥитэ тир уонна “Хаарбах туруктаах дьиэттэн көһөрүү” бырагырааматынан тутулла турар эбийиэктэргэ кэккэ боппуруостар баалларыгар кэпсэтии ыыттыбыт. Кэмигэр түмүктэниэ диэн эрэнэбит. Тупсаран оҥоруу хайысхатыгар былааннар ситэ иликтэр. Биһиги нэһилиэк дьаһалтатын, тэрилтэ салайааччыларын, уопсастыбаннаһы кытары сүбэлэһэн, горнайдар түмсэммит, «Манчаары оонньуулара» үрдүк таһымнаахтык ыытылларыгар бары кыһамньыбытын ууруохпут, – диэтэ Никита Андреев.
Вячеслав Алексеев.