Бүгүҥҥүттэн кэлэр нэдиэлэҕэ Бэрдьигэстээххэ ыытыллар «Манчаары оонньууларын» уотун эстафетата саҕаланна. Үгэс быһыытынан уоту Мэҥэ Хаҥаласка баар Манчаары төрөөбүт Арыылаах алааһыгар уматтылар.
Эстафета саҕаланар үөрүүлээх тэрээһинигэр СӨ Бырабыыталыстыбатын бэрэссэдээтэлин солбуйааччы, «Манчаары оонньууларын» тэрийэр кэмитиэтин бэрэссэдээтэлэ Сергей Местников, СӨ Успуорка уонна физическэй култуураҕа миниистирэ Иннокентий Григорьев, Мэҥэ Хаҥалас улууһун баһылыгын солбуйааччы Семен Потапов, Горнай улууһун баһылыга Никита Андреев, Баһылай Манчаары аатынан успуорт национальнай көрүҥнэрин киинин дириэктэрэ Гаврил Мохначевскай кыттыыны ыллылар.
Уоту уматыы Петр Тихонов алгыһыттан саҕаланна. Факелы бастакынан Мэҥэ Хаҥалас улууһун баһылыгын солбуйааччы Семен Потапов уматта. Факел уга мастан уонна тимиртэн оҥоһуллубут. Эстафета тиийбит нэһилиэнньэлээх пуунун ахсын факел угугар анал эргимтэлэр эбиллэн иһиэхтэрэ. Онон «Модун» киинин дизайнердара толкуйдаан оҥорбут факеллара аныгы өрөспүүбүлүкэ кэмин уонна уобараһын бэлиэтиир моһуоннаах диэн бэлиэтиэххэ сөп.
Быйыл дьаҥ туран, уот эстафетата түөрт күн устата ыытыллыаҕа. Уоту икки улууһунан уонна Дьокуускайынан барыта уон сүүрүүк тутан сүүрүөҕэ. Эстафетаны бастакынан Майа олохтоохторо көрсүөхтэрэ. Сүүрүүктэр мантан саҕалаан Аллараа Бэстээҕинэн, Дьокуускайынан, Горнайынан 280 км нөҥүөлээн, от ыйын 7 күнүгэр Бэрдьигэстээххэ «Чыпчаал» стадиоҥҥа «Манчаары оонньууларын» арыллыытыгар тиийиэхтэрэ.
«Манчаары оонньууларын» пресс-киинэ.
Платон Эверстов, Саргылаана Оконешникова хаартыскалара.