«Манчаары оонньууларын» уота Баһылай Манчаары төрөөбүт алааһыгар уматыллыаҕа
От ыйын 4 күнүгэр Мэҥэ Хаҥалас улууһугар Манчаары төрөөбүт Арыылаах алааһыгар XXI төгүлүн ыытыллар успуорт национальнай көрүҥнэригэр спартакиада уота уматыллан, эстафета саҕаланыаҕа.
Бу үөрүүлээх быһыыга-майгыга СӨ Бырабыыталыстыбатын бэрэссэдээтэлин солбуйааччы Сергей Местников, СӨ успуорка уонна физическэй култуураҕа миниистирэ Иннокентий Григорьев, Мэҥэ Хаҥалас улууһун баһылыга Николай Старостин, Горнай улууһун баһылыга Никита Андреев уонна Манчаары аатынан успуорт национальнай көрүҥнэрин киинин дириэктэрэ Гаврил Мохначевскай кыттыыны ылыахтара.
Эстафета уотун Саха сиригэр чөл олоҕу тарҕатааччы, физическэй култуура уонна успуорт үтүөлээх үлэһитэ, экстремал сүүрүүк Дмитрий Горохов уонна Саха АССР уһуну сүүрүүгэ уон төгүллээх чөмпүйүөнэ, успуорт маастара Афанасий Илларионов салалталаах сүүрүүктэр бөлөхтөрө арыаллыаҕа.
Бөлөххө Виктор Константинов, Мариянна Васильева, Валентина Доргуева, Виктория Баишева, Василий Уваровскай, Иннокентий Степанов, Екатерина Драгунова, Иннокентий Олесов уонна Владимир Сидоров киирдилэр. Кинилэр түөрт күн устата Мэҥэ Хаҥалас — Дьокуускай — Горнай хайысханан 300 км сүүрүөхтэрэ. Эстафета айанын оонньуулар логотиптаах массыына арыаллыаҕа.
Факел от ыйын 7 күнүгэр Бэрдьигэстээххэ кэлиэҕэ, «Чыпчаал» стадиоҥҥа оонньуулары арыйыаҕа.
«Манчаары оонньууларын» пресс-киинэ.