Маны аах Сүрүн

«Манчаары оонньууларын» тэрийии боппуруоһун чугастааҕы кэмҥэ быһаарыахтара

«Манчаары оонньууларын»  тэрийии боппуруоһун чугастааҕы кэмҥэ быһаарыахтара.

Горнайга коронавируһу утары быһыыны ылыы тэтимэ бытаанынан уонна коронавируһунан ыалдьыы элбээбитэ бэлиэтэнэринэн, «Манчаары оонньууларын» хайдах быһыылаахтык ыытары чугастааҕы кэмҥэ быһаарыахтара. Бүгүн, бэс ыйын 28 күнүгэр, суһал ыстаап мунньаҕар Ил Дархан Айсен Николаев быһаарарга сорудахтаата.
Санатан эттэххэ, спорт национальнай көрүҥнэригэр XXI төгүлүн ыытыллар спартакиада  от ыйын 6-11 күннэригэр ыытыллыахтаах. Бу далааһыннаах тэрээһиҥҥэ 7 тыһыынчаттан тахса киһи кыттыыны ылыаҕа диэн буолбута. Кинилэр бары быһыыны ылбыт буолуохтаахтара уонна коронавирустаабатах буолаллара ирдэммитэ. Ол гынан баран, коронавирус дьаҥыттан сылтаан, «Манчаары оонньууларын» көһөрөн кэбиһиэхтэрин сөп.
Айсен Николаев Өлүөхүмэҕэ Олоҥхо ыһыаҕа үрдүк таһымнаахтык ааспытыгар кэллиэгэлэригэр махтанна уонна Горнайга эпидемиологическай быһыы-майгы уустугун санатан туран, «Манчаары оонньууларын» ыытыыга этиилэрин чугастааҕы кэмҥэ киллэрэллэригэр соруйда. Ааспыт икки нэдиэлэ түмүгүнэн онно 38 киһи коронавирустаабыт.

«Суһал ыстаап «Манчаары оонньууларыгар» дуоспуруннаахтык ылсарыгар көрдөһөбүн. Өскөтүн Олоҥхо ыһыаҕа ыытыллыбыт сиригэр, Өлүөхүмэҕэ, икки нэдиэлэ инниттэн коронавируһунан ыалдьыы бэлиэтэммэтэх буоллаҕына, Бэрдьигэстээх балаһыанньата долгутар. Ааспыт нэдиэлэҕэ дьон ыарахан туруктаах реанимацияҕа киирбит түбэлтэлэрэ кытары бэлиэтэммитэ«, — диэтэ кини.

Өрөспүүбүлүкэ баһылыга маны сэргэ, Горнай оройуонугар коронавируһу утары быһыыны туруоруу тэтимэ бытаанын бэлиэтээтэ — манна 60% былааҥҥа бүгүҥҥү күҥҥэ, нэһилиэнньэ 22,8 % эрэ быһыыны ылан олорор. Тиийбит вакцинаттан 85%  эрэ туһаныллыбыт. Сүрүн санитарнай быраас эппитинэн, быһыыны ылыы таһыма күрэхтэһиигэ кыттыахтаах спортсменнар ортолоругар кытары кыра, элбэх киһи ыспыраапкалаах (медотвод).

«Маннык балаһыанньа күрэхтэһиини хайдах киэбинэн ыытары толкуйдатар, эбэтэр ыытар наада дуо диэн санааҕа аҕалар. Өскөтүн тэрийэр кэмитиэт уонна оройуоннааҕы суһал ыстаап наадалаах миэрэлэри ылбатахтарына, биһиги  төрдүттэн уларытыы миэрэлэрин ылыыга тиийэ барыахпытын сөп. Манна спортсменнар амбицияларынан буолбакка, дьон олоҕор уонна доруобуйатыгар куттал суох буоларын туһугар быһаарыыны ылар наада«,  — диэтэ Айсен Сергеевич.

Итинник этэн туран, баһылык өрөспүүбүлүкэҕэ быһыыны ылыы тэтимин иһитиннэрдэ. Бастыҥ көрдөрүүлээхтэринэн хотугу оройуоннары ааттаталаата — Анаабыр оройуона (91% быһыыны ылбыт), Аллайыаха оройуона (87%), Муома оройуона (86%), Эбээн Бытантай (84%), Эдьигээн оройуона (82%), Аллараа Халыма (78%). Оттон кини этэринэн, хаалан иһээччилэргэ Нерюнгри оройуона (33%), Таатта, Чурапчы, Амма (40%) киирэллэр.

Андрей Сорокин (СИА) хаартыскаҕа түһэриитэ

 

0
0