Нацбырайыактар Успуорт

«Манчаары оонньууларыгар» быһыыны ылбыттар кыттыахтара

«Манчаары оонньуулара» успуорт национальнай көрүҥнэрин XXI Спартакиадата от ыйын 6-11 күннэригэр Горнай улууһугар Бэрдьигэстээххэ ыытыллыаҕа.

СӨ Ил Дархана Айсен Николаев сорудаҕынан Саха сирин премьерэ Андрей Тарасенко уонна кини солбуйааччыта Сергей Местников оонньууларга тутулла турар успуорт эбийиэктэрин көрдүлэр, спартакиадаҕа бэлэмнэнии таһымын сыаналаатылар. «Манчаары оонньууларын» ыытарга булгуччулаах ирдэбил — санитарнай боротокуолу тутуһуу буолар диэн Бырабыытылыстыба пресс-сулууспатыгар иһитиннэрдилэр.

2021 сыл саҥатыгар Бэрдьигэстээххэ элбэх функциялаах спортивнай сааланы үлэҕэ киллэрбиттэрэ. Эбийиэк «Демография» национальнай бырайыак «Спорт — олох нуормата» федеральнай бырагырааматынан тутуллубута. Билигин 1000 миэстэлээх спорт саалата, 3000 миэстэлээх стадион, сыал ытар комплекс, араас көрүҥҥэ аналлаах успуорт былаһаакката оҥоһулла тураллар, ону таһынан ипподром саҥардыллан эрэр. Улууска суолу-ииһи оҥоруу, электроэнергиянан хааччыйыы уонна сири-уоту тупсарыы үлэлэрэ ыытылыннылар.

Горнай оройуонун баһылыга Никита Андреев бэлэмнэнии үлэлэрэ сөптөөх тэтиминэн ыытылла туралларын бэлиэтиир, оонньуулар саҕаланыыларыгар олоччу бэлэм буолуохтара диэн бигэргэтэр.

Андрей Тарасенко  коронавируһу тарҕаппат сыалтан, тэрийээччилэр, спортсменнар, судьуйалар, култуура бырагырааматын кыттыылаахтара бары быһыыны ылбыт буолуохтаахтара ирдэнэрин эттэ. 

Физкултуура уонна успуорт миниистирэ Иннокентий Григорьев спартакиадаҕа Саха сирин араас оройуоннарыттан уонна үөрэх кыһаларыттан 40-ча хамаанда кыттыыны ылаары сайаапка түһэрбитин иһитиннэрдэ. Барыта 259 мэтээл 11 араас күрэскэ оонньонуоҕа.

«Саха сирэ» хаһыат, edersaas.ru

Хаартыска СИА

0
1