Сүрүн Успуорт

«Манчаары оонньуулара», Тааттаҕа көрсүөххэ диэри!

Бүгүн, от ыйын 11 күнүгэр, Бэрдьигэстээххэ «Манчаары оонньуулара» түмүктэннэ. Спартакиаданы сабар үөрүүлээх тэрээһин ыытыллан, кыайыылаахтары чиэстээтилэр.

Оонньуулары тэрийэр кэмитиэт уонна өрөспүүбүлүкэ салалтата оонньуулар үрдүк таһымҥа ыытыллыбытын бэлиэтээтилэр.

СӨ Бырабыыталыстыбатын бэрэссэдээтэлин солбуйааччы, оонньуулары тэрийэр кэмитиэт бэрэссэдээтэлэ Сергей Местников: «Күндү Сахабыт сирин бары олохтоохторо, XXI төгүлүн «Манчаары оонньуулара» ситиһиилээхтик түмүктэммитинэн эҕэрдэлиибин. Спартакиада өрөспүүбүлүкэбит норуоттарын култууратын, үгэстэрин, успуордун, өйүн-санаатын, талаанын түмэр тэрээһин буолар. Оонньуулар ыытыллар оройуона социальнай-экономическай сайдыытыгар тэрээһин улахан суолталаах. Мин спортсменнарга биһиэхэ успуорт бырааһынньыгын бэлэхтээбиттэригэр, кыайыыга дьулууру, өрөгөйү көрдөрбүттэригэр махтанабын», — диэн эҕэрдэлээтэ.

Горнай Маҕараһыттан сылдьар быйылгы «Дыгын оонньууларын» үһүс призеругар, мас-рестлиҥҥа аан дойду чөмпүйүөнүгэр Дьулустаан Ноговицыҥҥа улуус баһылыга Никита Андреев, ини-бии Контоевтар уонна биир дойдулаахтара успуорт национальнай көрүҥнэрэ сайдыытыгар өҥөтүн иһин УАЗ-ПАТРИОТ массыынаны бэлэхтээн соһуттулар.

Кэлэр XXII «Манчаары оонньуулара» 2025 сылга Таатта улууһун Ытык Күөлүгэр ыытыллыаҕа. Онон горнайдар оонньуу бэлиэтин таатталарга үөрүүлээх быһыыга-майгыга туттардылар.

Түөрт бөлөҕүнэн кыайыылаах улуустар —

Бастакы бөлөх:

Бастакы миэстэ – Мэҥэ Хаҥалас улууһа

Иккис миэстэ –  Дьокуускай куорат

Үһүс миэстэ – Хаҥалас улууһа

Иккис бөлөх:

Бастакы миэстэ – Чурапчы улууһа

Иккис миэстэ – Үөһээ Бүлүү улууһа

Үһүс миэстэ – Нам улууһа

Үһүс бөлөх:

Бастакы миэстэ – Горнай улууһа

Иккис миэстэ – Кэбээйи улууһа

Үһүс миэстэ – Дьааҥы улууһа

Төрдүс бөлөх:

Бастакы миэстэ – Анаабыр улууһа

Иккис миэстэ – Өлөөн улууһа

Үһүс миэстэ – Муома улууһа

Мария Васильева хаартыскалара.

2
0