Уопсастыба

«Манчаары оонньуулара»: күрэхтэһии сонунун билэ олорорго мобильнай сыһыарыы баар буолла

Горнай улууһугар «Манчаары оонньууларын» күрэхтэһиилэрин смартфонунан билэ олоруохха сөп.

Онно тэрээһиннэр, сонуннар барыта бааллар, күрэхтэһии кыттыылаахтарыгар бу бэртээхэй көмөлөһөөччүнэн буолуо диэн «Манчаары оонньууларын» пресс-киинигэр сигэнэн СИА иһитиннэрэр.
Бу табыгастаах ньыманан сибиэһэй сонуну түргэнник тиэрдэр соруктаах. Маныаха коронавирус инфекциятын тарҕаппат туһугар, Бэрдьигэстээххэ «Манчаары оонньуулара» көрөөччүтэ суох ыытыллар кэмигэр ордук наадалаах.
«Манчаарыы оонньуулара» успуорт национальнай көрүҥнэригэр ХXI спартакиада мобильнай сыһыарыыта кыттааччыларга, тэрийээччилэргэ, тэрээһини барытын билэ-көрө олоруон баҕалаах дьоҥҥо улахан көмөлөөх буолуоҕа. Сыһыарыыга бары тэрээһиннэр бырагыраамалара күннэринэн, «Манчаары оонньууларын» устуоруйата, күрэхтэһиилэр көрүҥнэрэ, спартакиада ымыыларын туһунан иһитиннэрии, эстэпиэтэ уотун, партнердар тустарынан, ону сэргэ күөн күрэһи ыытыы киллэриллибиттэр. Интерактивнай каартанан Бэрдьигэстээххэ уонна тэрээһиннэр ыытыллар сирдэригэр чуо булан сылдьыаххыт.
Анал сыһыарыы билигин тестовой эрэсииминэн үлэлиир. Ол гынан баран, ким баҕалаах билигин хачайдаан ылыан уонна PlayMarket уонна App Store Android, IOS туруорунуон сөп. Сыһыарыыны «Арт Стоун» хампаанньа оҥорбут.
1
1