«Манчаары оонньууларын» хапсаҕайын аар дархана Данил Иванов: «Кыайыыга эрэллээх этим»
«Манчаары оонньууларын» хапсаҕайын муҥутуур кыайыылааҕынан Хаҥаластан сылдьар 19 саастаах Данил Иванов буолла.
Быйылгы оонньуулар хапсаҕайын аар дарханын аатын иһин уон бөҕөс туһунна. Финалга Хотугулуу-Илиҥҥи федеральнай университет хамаандатын хапсаҕайдьыта Максим Толмачев уонна Хаҥалас улууһун хамаандатыттан Данил Иванов күрэхтэстилэр.
Манна кыайыылаах Данил Ивановка Таатта улууһуттан сэрии кыттыылааҕа Дмитрий Ананьевич Петров төрөөбүтэ 100 сылынан кини сыдьааннара уонна «Охотный двор» маҕаһыын биэстэ эстэр сааны бэлэх ууннулар.
Данил көҥүл тустуунан идэтийэн дьарыктанар, ХИФУ физкултуурунай инстутугар үөрэнэр. Кини өрөгөйүн туһунан санаатын маннык үллэстэр:
— Аар дархан аатын иһин финалыгар кыайбытым миэхэ соһуччу буолбатах, бэйэбэр эрэллээх этим. Инники былааннарым тустууга туһаайыллаллар. Василий Уваровка дьарыктанабын. Бу кыайыыбын доҕотторбор, дьоммор, Хаҥалас хамаандатыгар, миэхэ ыалдьыбыт дьоҥҥо аныыбын.
Оттон «Манчаары оонньууларын» хапсаҕайга 95 киилэттэн үөһээ ыйааһыҥҥа үрүҥ көмүс мэтээли ылбыт уонна муҥутуур кыайыылаах аатын иһин киирсиигэ финаллаабыт Максим Толмачев күрэхтэһии туһунан маннык диир:
— Кыайыыга дьулуурдаах буолуу элбэҕи быһаарар, миэхэ ол тиийбэтэ быһыылаах дии санаатым. Иккис миэстэ буолартан астыммаппын, мин «Манчаарыга» кыайардыы ностуруойдаммытым. Бастыахпын баҕарабын, онон салгыы өссө күүскэ дьарыктаныам. Билигин көҥүл тустууга аан дойду чөмпүйэнээтигэр кыттар быраабы ылар иһин Арассыыйа первенствотыгар бэлэмнэнэбин.
Айтана Аммосова, edersaas.ru