“Манчаары оонньууларын” бастакы кыайыылаахтарын бэҕэһээ Бэрдьигэстээххэ Кыайыы болуоссатыгар наҕараадалаатылар. Спартакида 54 мэтээлин кэмпилиэгин спортсменнар кэтэн, кыайыы өрөгөйүн билиэхтэрин биллилэр.
Дьааҥы улууһун Сайдыы нэһилиэгиттэн сылдьар Тимофей Слепцов хотугу многоборьеҕа күрэхтэһэн, ыстаҥа түһүмэҕэр бастаабыт. Кини 2015 сылтан атах оонньууларынан дьарыктанар эбит. “Быйылгы “Манчаарыга” кыттаары хотугу многоборьенан эрчиллэн саҕалаабытым. Онуоха эрдэттэн бэлэмнээх буоламмын, бу көрүҥҥэ бастаатым дии саныыбын. Атах оонньууларыгар тириэньэрбинэн Максим Оегостуров буолар, киниэхэ махтанабын. Дьарыкка сылдьан рекордка чугаһатар этим, ол эрээри күрэхтэһии кэмигэр атахпын эчэтэммин ол кыаллыбата», — диэн чөмпүйүөн санаатын үллэһиннэ.
“Манчаары оонньууларын” самаай кыра саастаах кыттааччытынан Арктикатааҕы агротехнологическай университет хамаандатыттан 12 саастаах Любовь Михайлова буолар. Любовь хотугу многоборье 2 км сүүрүүтүгэр 18 кыттааччыттан иккис миэстэ буолла. Кини бэйэтин уонна дьарыгын туһунан маннык кэпсиир:
Анаабыр улууһун Үрүҥ Хайатын ыччата Дьулус Туприн хотугу многоборьенан утумнаахтык дьарыктанар. Кини аркааны быраҕыыга бастаата. “Күрэхтэһии этэҥҥэ ааста. Сарсыарда эрдэ туран кыайыыга ностуруойкаламмытым. Көрдөрүүм үчүгэй, ол эрээри бэйэм тус рекордпар тиийбэтим. Күрэхтэһиигэ түөрт сылы быһа дьарыктанным, бастакы “Манчаары оонньууларым” буолар. Тиэхиньикэни сатыахха наада дии саныыбын”, — диэн чөмпүйүөн санаатын этэр.
Наартаны ойууга рекордсмен, Өймөкөөн Томторун кэскиллээх ыччата Георгий Софронов тынзяны быраҕыыга иннин кимиэхэ даҕаны биэрбэтэ. 17 саастаах спортсмен хотугу многоборьенан кыра оҕо эрдэҕиттэн аҕатын батыһан дьарыктанан саҕалаабыт. Георгий күрэхтэһии туһунан маннык кэпсиир:
Эр дьоҥҥо 10 км сүүрүүгэ Дьокуускай хамаандатыттан Николай Копырин бастаан, “Манчаары оонньууларын” икки төгүллээх чөмпүйүөнүнэн буолла. Бу иннинэ кини Үөһээ Бүлүүтээҕи “Манчаарыга” уолаттарга 5 км сүүрүүгэ бастаан турардаах. “Күн-дьыл куйааһа, онно эбии буруо туран үгүс спортсмеҥҥа мэһэйдээтэ. Сылы быһа үлэлээн, тиритэн-хорутан, эчэйии да ылан, бу кыайыы судургутук кэллэ диэбэппин”.
Ньурба ыччата Николай Обоев национальнай многоборьенан дьарыктаммыта сыл аҥаара буолбут. Бу көрүҥ “Үс төгүл үс” түһүмэҕэр Николай 33 м 56 см ойон, “Манчаары оонньууларын” кыһыл көмүс мэтээлин түөһүгэр кэтэн үөрүүтэ үксээтэ. Кини: “Кыайыыбын балтараа саастаах уолбар – Мирославка аныыбын. Петр Давыдовка дьарыктанабын. Өссө үс көрүҥ хаалла. Кыратык саллабын, ол эрээри күрэхтэһиигэ ким даҕаны хотторо кэлбэт. Онон түһүлгэ көрдөрүөҕэ дии саныыбын», — диэн үөрүүтүн биһиги саайтпыт ааҕааччыларыгар үллэһиннэ.
Айтана Аммосова, edersaas.ru
Сүрүн хаартыска Екатерина Дмитриева түһэриитэ.