Горнай улууһун Маҥаны нэһилиэгин олохтоохторо сыстыгыннаах дьаҥ өрө турбутунан сибээстээн, дьиэҕэ олорор кэмнэригэр бэйэлэрин сөбүлүүр дьарыктарынан бириэмэлэрин туһалаахтык атаараллар.
edersaas.ru
Холобура, эйэҕэс эбээ, амарах ийэ Маргарита Капитонова XXI Манчаары оонньууларын көрсө сиэлинэн сөрүү өрөн саҕалаата. Кини өссө тайах, таба тыһын имитэн оҕолоругар, быраатыгар унтуу тикпит. Маны таһынан, макраменан дьиэ сибэккилэригэр киэргэл оҥорор.
Маргарита Ивановна нэһилиэгэр, улууһугар бэтэрээннэр ахсааннарыгар биллэр бастыҥ дуобатчыт. Ону туоһулуур элбэх мэтээллээх, кырааматалаах. Кини өссө сиэннэригэр остуол оонньуутун хабылыгы, хаамысканы үөрэтэр. Быйыл сахалыы таҥаһыгар киис имитэн киэргэтэн биэрбит, өссө дэйбиир оҥорор эбит.
Маргарита Ивановна күнүн туһалаахтык атаарар, сиэннэрин үөрэхтэригэр көмөлөһөн, минньигэс остуолун бэлэмнээн күн солото суох.
Бу туһунан олохтоох дьаһалта баһылыгын солбуйааччы Мария Иванова иһитиннэрдэ.
Елена ПОТОЦКАЯ, «Саха сирэ» хаһыат, edersaas.ru