Саха циркэтин артыыстара дьоһуннаах наҕараадалары туттулар.
Бэҕэһээ Саха Өрөспүүбүлүкэтин бриллиантовай циркэтигэр VI норуоттар икки ардыларынааҕы “Мамонтенок” циркэ бэстибээлэ саҕаланна. Бу улахан суолталаах сабыытыйа быйыл Арассыыйа циркэтин 100 уонна Саха Өрөспүүбүлүкэтин судаарыстыбаннай циркэтин 25 сылларыгар ананар.
Сарсыарда 10 чаастан “Сахамедиа” өрөспүүбүлүкэтээҕи медиа-кииҥҥэ Марфа уонна Сергей Расторгуевтар ааттарынан СӨ Судаарыстыбанннай циркэтин дириэктэрэ-уус уран салайааччыта Сергей Расторгуев уонна араас дойдулартан – Монголияттан, Кытайтан, Белоруссияттан, Казахстантан, Бурятияттан итиэннэ Москваттан норуоттар икки ардыларынааҕы Дьүүллүүр сүбэ чилиэннэрэ кыттыылаах пресс-конференция тэриллибитэ.
Саха циркэтин дрессировщицата Мария Жиркова.
Күнүс 15 чаастан уонна киэһээ куонкурус бырагырааматын бастакы, иккис түһүмэхтэрэ хайыы-үйэҕэ ыытыллыбыттара. Манна 3-түү чаас устата Арассыыйа киин куораттарын уонна эрэгийиэннэрин, Израиль, Вьетнам, Монголия, Белоруссия, Казахстан, Бурятия, о.д.а. араас дойдулар циркэлэрэ бастыҥ нүөмэрдэрин дьүүллүүр сүбэ уонна көрөөччүлэр дьүүллэригэр таһаардылар.
Оттон киэһэ 18 чаастан буолбут бэстибээли үөрүүлээхтик аһыыга СӨ култууратын уонна духуобунай сайдыытын миниистирэ Юрий Куприянов өрөспүүбүлүкэ салалтатын аатыттан Саха циркэтин 25 сыллаах үбүлүөйүнэн истиҥник эҕэрдэлээн туран, бастыҥ артыыстарга үрдүк наҕараадалары туттарбытын көрөөччүлэр дохсун ытыс тыаһынан көрүстүлэр. Ол курдук, Пекиннээҕи циркэ оскуолатын бүтэрбит Бастакы көлүөнэ акробат-артыыстар лиидэрдэрэ Александр Посельскайга уонна артыыс Дмитрий Халыевка (Димбас), кырачааннар сөбүлүүр клоуннарыгар — Саха Өрөспүүбүлүкэтин үтүөлээх артыыһа үрдүк аат иҥэрилиннэ.
Бүгүн куонкурус түмүктэнэр, күнүс 16 чаастан кыайыылаахтар ааттарын билиэхпит.
Татьяна МАРКОВА.
Ааптар хаартыскаҕа түһэриилэрэ.