Ньурба улууһун Малдьаҕарыгар 4 кыбартыыралаах дьиэ үлэҕэ киирдэ. Толору хааччыллыылаах дьиэ » Мин Сахам сирэ — XXI үйэҕэ» үтүө дьыала саҕалааһын чэрчитинэн тутулунна. Былырыын күһүөрү сайын тутууну саҕалаабыттара.
Александр Тарасов, «Саха сирэ» хаһыат, www.edersaas.ru
Дьиэни үлэҕэ киллэрэр тэрээһиҥҥэ СӨ ОДьКХ уонна энергетикаҕа миниистирэ Гаврил Левин уонна СӨ Каадыр бэлиитикэтигэр департаменын салайааччыта Андрей Мартынов уонна олохтоохтор кытыннылар. Үөрүүлээх быһыыга-майгыга үгэскэ кубулуйбут аалай лиэнтэни быһыы кэнниттэн Малдьаҕар баһылыга Никита Иванов эдэр исписэлиистэри эҕэрдэлээн туран, кыбартыыралар күлүүстэрин туттарда.
Саҥа дьиэҕэ киирбит Сардана, Иннокентий Духовтар
Саҥа кыбартыыраҕа тиксибит эдэр ыаллар Сардаана, Иннокентий Духовтар: «Үөрүүбүтүттэн көтүөхпүтүн кынаппыт эрэ суох. Эдэр исписэлиистэргэ диэн анал бырагырааманан бу кыбартыыраны биэрдилэр. Икки уол оҕолоохпут. Бу күннэргэ көһүөхпүт. Толору хаачыллыылаах кыбартыыра олорорго олус табыгастаах. Түгэнинэн туһанан, бу тутууну ыытыыга туох баар сыратын биэрэн кыһаллыбыт нэһилиэк баһылыга Никита Ивановка ис сүрэхпититтэн махталбытын биллэрэбит», — диэн үөрүүлэрин үллэһиннилэр. Ыал ийэтэ оскуолаҕа — математика учуутала, ыал аҕата — бэтэринээр.
Александр Тарасов, «Саха сирэ» хаһыат, www.edersaas.ru