Олунньу 2 күнүгэр коммунальнай хаһаайыстыба уонна энергетика миниистирэ Гаврил Левин салайааччылаах бөлөх Ньурба улууһун нэһилиэктэрин олохтоохторугар бырабыыталыстыба ааспыт сыллааҕы отчуотун иһитиннэрдэ, ыйытыыларыгар хоруйдаата.
Александр ТАРАСОВ, «Саха сирэ» хаһыат, https://edersaas.ru/
Ньурба улууһугар отчуоттуур бөлөҕү Левин салайда
Малдьаҕар: уу станциятын үбүлээҥ!
Ханна да буоларын курдук, саҥа оскуола уонна хочуолунай дьиэтэ тутулларын туруорустулар. Оскуола лаппа эргэрэн турарын уонна тымныытын эттилэр. Хочуолунай боппуруоһугар СӨ ОДьКХ уонна энергетикаҕа миниистирэ Гаврил Левин итиинэн хааччыйар эбийиэк кыамтата толору эппиэттиирин эттэ, ол оннугар дьиэтэ чахчы эргэрэн турарыгар сөбүлэстэ. Бу тута быһаарыллар кыаҕа суох. «ОДьКХ» ГУП ааспыт сылларга 200-тэн тахса итиинэн хааччыйар эбийиэги тутууга баантан 5 млрд солк. кирэдьиит ылбыта. Маны тустаах хампаанньа төлүүрүгэр тыын биэрэр инниттэн, икки сыл устата коммунальнай хаһаайыстыба эбийиэктэрин тутууга мораторий биллэрилиннэ.
Ньурба улууһун 7 нэһилиэгэр ууну ыраастыыр станциялары таҥан туруорбуттара. Балар үлэлээбэккэ тураллар. Маннык балаһыанньа станциялары олохтоох дьаһалта көрүүтүгэр биэрбиттэригэр үөскээтэ.
Малдьаҕар баһылыга Никита Иванов:
— Ороскуоту олохтоох дьаһалта бүддьүөтэ хайдах да уйунар кыаҕа суох, ыарахана бэрт. Холобур, сылга 300 тыһ солкуобайдаах уоту сиир. Манна исписэлиистэр хамнастарын, станция ууну ыраастыыр өҥөтүн киллэрдэххэ, ороскуота өссө улаатар. Үс ый үлэлэтэ сылдьыбыппыт. Дьиҥэр, ууну олус үчүгэйдик ыраастыыр этэ. Үлэлиирэ буоллар, олохтоохтор ыраас ууну иһэн абыраныа этибит. Онон бырабыыталыстыба түргэнник үбүлээһинин быһаарыан наада.
Левин манна уопсай хабааннаахтык: «Болҕомтоҕо ылыллан, сөптөөх үлэ барыан наада» диэтэ.
Ньурбачаан: курунньугу сиидэлээҥ!
Нэһилиэк орто оскуолатын таһыгар киин хочуолунай турар. Дириэктэр Татьяна Саввинова, турбатыттан тахсар курунньук көрдө-көрбүтүнэн оскуола үрдүгэр түһэрин кыһыйан кэпсээтэ. Саас түннүгү астахтарына, курунньук оскуола иһигэр киирэр. Онон хочуолунай турбатыгар анал сиидэлиир тэрили олордоллоругар модьуйда.
Манна ОДьКХ ГУП Ньурбатааҕы филиалын дириэктэрэ Алексей Тихонов чопчу хоруйдаата:
— Быйыл сайын курунньугу сиидэлиир анал тэрили туруоруохпут.
Түмүккэ, икки нэһилиэк олохтоохторо бырабыыталыстыба 2016 сыллааҕы үлэтин биһирииллэрин биллэрдилэр.
Александр ТАРАСОВ, «Саха сирэ» хаһыат, https://edersaas.ru/