Малахов биэриитигэр мэҥнээх сахалар аймахтыы буолаллара дакаастанна (ХААРТЫСКА)

«Россия 1» ханаалга «Прямой эфир» Андрей Малахов биэриитигэр Саха сириттэн ураты дьүһүннээх, элбэх мэҥнээх Ирина Павлуцкая уонна Никита Хон ыалдьыттаатылар. Биэриигэ өссө Ирина төрөппүт ийэтэ Мира Васильеваны ыҥырбыттар. edersaas.ru

Быһа эфииргэ кинилэр көрсүһүүлэрин көрдөрдүлэр. Ирина тирии ыарыылааҕыттан сылтаан, төрөөтүн кытта ийэтэ аккаастаммыт. «Оҕобун миэхэ көрдөрбөтөхтөрө, бары аймаммыттар этэ. Кэргэммэр эппитим. Балыыһаттан тахсарбытыгар ким да көрсө кэлбэтэҕэ. Бары аккаастаммыттара, ол иһин мин эмиэ аккаастаммытым буолуо… «Туймаада» стадион аттынааҕы ыскамыайкаҕа хаалларбытым. Оҕом утуйа сытар этэ«, — диир Мира Васильева.

Саалаҕа мустубут дьон бары кыыс ийэтин сэмэлээтилэр. Ону Мира дьиэ кэргэнин ыһымаары оҕобун хаалларбытым диэн быһаарда. Бастакы оҕото билигин 29 саастаах кыыс эбит. Кэлин кэргэнэ суох буолбутун кэннэ, Иринаны оҕо дьиэтиттэн ылбатах. Иккиһин ыал буолбут, икки уол оҕоломмут.

Биэрии бүтүүтэ ДНК-тест быһаарбытынан Никита Хон уонна Ирина Павлуцкая чугас аймахтыыларын көрдөрдө. Аҕалара бииргэ төрөөбүт буолуохтарын сөп эбит.

Биэриигэ өссө фотограф Вадим Руфов, Ирина улааппыт оҕо дьиэтин дириэктэрэ Наталья Гаязова, адвокат Светлана Добровольская, режиссер Борис Грачевскай, дизайнер Тамара Умаханова, суруналыыс Алла Данько, тирии бырааһа Мария Гришина кытыннылар.

Мэҥнээх сахалар Андрей Малаховка ыалдьыттаатылар (ХААРТЫСКА)

Николай Попов, «Саха сирэ» хаһыат, edersaas.ru 

Хаартыска: ЯСИА