“Тас дойдуттан кэлэр сапчаастарбытыгар уустуктар бааллар эрээри, итилэри манна Арассыыйаҕа оҥоһуллар сапчаастарынан уларытыахха эбэтэр үһүс дойду нөҥүө ылыахпытын сөп”, – диэн иһитиннэрэр “Саха сирин тимир суоллара” хампаанньа Алданнааҕы ломокотивнай депотун инженер-технолога Максим Егоров.
Максим Олегович Нам улууһуттан төрүттээх. Суол-иис, айан-сырыы Уһук Илиннээҕи федеральнай университетын 2014 сыллаахха бүтэрэн Алданнааҕы локомотивнай депоҕа үлэлии киирбитэ. Билигин инженер-технологынан үлэлиир. Инженер-технолог сүрүн үлэтэ технологическай каартанан сирдэтэн өрөмүөн үлэтэ туох да харгыһа суох барарын хааччыйыы буолар.
– Үөрэхпин бүтэрэн кэлэн баран бастаан слесарынан үлэлээбитим, онтон өрөмүөннүүр сыах маастарынан анаммытым. 2017 сылтан инженер-технологынан үлэлиибин. Сүрүн үлэм диэн технологическай каартаны оҥоруу, үлэһиттэр өрөмүөн технологиятын быһаччы уонна сыыһата суох тутуһалларын хонтуруоллааһын буолар. Тимир суол кыраҕы хараҕы уонна чуолкай буолууну ирдиир. Онон туох барыта орун-оннугар буолуохтаах. Этэргэ диэри, биир буолта төлө барда да, үлэ тохтуур. Локомотив суолга туран хаалыан сөп, оччотугар туох баар график ыһыллан хаалар, – диэн кини үлэтин туһунан кэпсиир.
Арҕааҥҥы дойдулар Арассыыйаҕа араас хааччаҕы киллэриэхтэриттэн ордук тиэхиньикэлэргэ саппаас чаастары ылыы уустугурда. Манна сыһыаран: “Тас дойдуттан кэлэр сапчаастар тустарынан эттэххэ, сүрүннээн олору хайа баҕарар манна бэйэбитигэр оҥоһуллар сапчаастарынан солбуйуохпутун сөп. Локомотив ходовой чааһа барыта Арассыыйаҕа оҥоһуллар буолан, үлэлииргэ судургу уонна табыгастаах. Саҥа сыахпыт аһылыннаҕына локомотив, богуон көлүөһэлэрин бэйэбит таҥар, өрөмүөннүүр буолуохпут”, – диэн бэлиэтиир кини.
Аграфена КУЗЬМИНА