Бүгүн СӨ Ил Дарханыгар өрөспүүбүлүкэ экэниэмикэтэ бигэ туруктаах буолуутугар суһал ыстаап мунньаҕын кэнниттэн СӨ экэниэмикэҕэ миниистирэ Майя Данилова суруналыыстарга өрөспүүбүлүкэ экэниэмикэтэ этэҥҥэ буоларыгар бу күннэргэ туох-ханнык миэрэлэр ылыллыбыттарын туһунан иһитиннэрдэ.
— Билигин экэниэмикэ бигэ туруктаах буоларын туһугар эрэгийиэннээҕи уонна федеральнай анал өйөбүл миэрэлэр чэрчитинэн үлэлии олоробут. Холобур, Арассыыйа Федерацията дойду үрдүнэн тустаах боппуруостары быһаарыыга барыта 243 анал миэрэни ылыммыта.
Муус устар 19 күнүгэр өйөбүл бэһис бакыата оҥоһуллубута. Манна чуолаан Уһук Илиҥҥи уокурукка уонна Арктикаҕа сыһыаннаах инвестиционнай бырагыраамалары субсидиялаһыҥҥа көрүллэр ставка бырыһыана киирэллэр. Биһиги бу өттүгэр РФ Уһук Илини сайыннарыыга министиэристибэтигэр этиилэрбитин хайыы-үйэ ыыппыппыт. Инвестиционнай бырайыактар олоххо киирэр түгэннэригэр, холобур, 11 тыһ. кэриҥэ оробуочай исписэлиис үлэһит миэстэтэ баар буолуохтаах. Бырайыактартан Саха сиригэр Жатайдааҕы судоверфы саҥардан оҥорууга, Аллараа Бэстээххэ таһаҕаһы тиэйиигэ аналлаах бириистэни, Дьокуускайга саҥа кыбаарталлары, гостиницалары тутуу уонна киин куоракка авиапорду саҥардыыга көмө оҥоһуллуохтарын сөп. Бэһис федеральнай бакыакка бүддьүөттэн субвенцияны улаатыннарыы баар. Манна, саамай сүрүнэ, территориальнай мэдиссиинискэй пуондалар хабыллаллар. Бу туох көдьүүстээҕий? Бастакы уочаратынан нэһилиэнньэни, балыыһалары уонна поликлиникалары эминэн-томунан хааччыйыы быдан тупсуоҕа.
Эбэн этэр буоллахха, эрэгийиэннээҕи уонна федеральнай таһымҥа ылыллыбыт өйөбүл миэрэлэри түргэнник уонна судургутук олоххо киллэриигэ болҕомто күүскэ ууруллар. Саха сиринээҕи өйөбүл миэрэтин бакыатын суумата 15 млрд 700 мөл солк. тэҥнэһэр. Билиҥҥи туругунан, бородууктанан, табаарынан хааччыйар тустаах хампаанньаларга 1 млрд 600 мөл. солк тиэрдилиннэ. Бу көмө көдьүүстээҕин тута көрдөрдө. Ол курдук, инфляция аһара үрдээһинин тохтоттубут, — диэн миниистир Майя Андреевна быһааран биэрдэ.
Александр Тарасов, «Саха сирэ».