Бу күннэргэ Өймөкөөн улууһун баһылыга Иннокентий Сивцев Дьокуускайга командировкаҕа сылдьар кэмигэр тустаах салайааччылары кытта кэпсэтэн, баһаары умуруорууга туттуллар тэриллэри, тиэхиньикэни буларга үлэлэстэ.
Ол курдук, соторутааҕыта урбаанньыт Арсен Томскай салайар кэмиэрчэскэйэ суох уопсастыбаннай тэрилтэтин Sinet Spark пуондатын үлэһиттэрэ Өймөкөөн улууһугар ойуур баһаарын бохсууга туһанар квадрокоптердары, араадьыйа ыстаансыйаларын, уу кутар суумкалары (РЛО), бэнсиининэн үлэлиир мотопомпалары, сухой паектары, күрдьэхтэри, спутниковай төлөпүөннэри, респиратордары, буруоттан көмүскэнэр ачыкылары уо.д.а. баһаары бохсууга олус наадалаах тэриллэри туттарбыттара.
Улуус баһылыга Иннокентий Сивцев иһитиннэрбитинэн, бу күннэргэ аны «Майтона» тэрилтэ булууктаах уонна баһар куопсуктаах саҥа «Беларусь» тыраахтары биэрдэ.
— Тымныы полюһун олохтоохторун аатыттан «Майтона» тэрилтэ салайааччыларыгар бырааттыы Ушницкайдарга Өймөкөөн улууһун курдук ыраах сиргэ баһаары умуруорууга туттуллар тиэхиньикэнэн хааччыйбыттарыгар барҕа махталбытын тиэрдэбин. Ыаллыы Муома улууһугар үөскээбит ыччаттар хоту дойду тыйыс усулуобуйалаах сирин олоҕун-дьаһаҕын, кыһалҕаларын билэр буолан, балаһыанньабытын өйдүүллэр, — диэн Иннокентий Сивцев санаатын үллэһиннэ.
От ыйын саҥатыгар Өймөкөөн улууһугар улахан ойуур баһаардара туран, Төрүт, Өймөкөөн, Үчүгэй нэһилиэктэрин олохтоохторугар кутталы үөскэтэ сылдьыбыттара. Онно тиэхиньикэ тиийбэт буолан, уустук балаһыанньа үөскүү сылдьыбыта.
Елена ПОТОЦКАЯ.