Өлүөнэ өрүс мууһа Дьокуускай куорат сиринэн-уотунан устар, уу таһыма түһэр диэн брифиҥҥэ бырабыыталыстыба бэрэссэдээтэлин солбуйааччы Алексей Колодезников иһитиннэрдэ.
edersaas.ru.
– Бэҕэһээ ыытыллыбыт дэлби тэптэрэр үлэ түмүгэр киин куоракка уу таһыма 40 см түстэ. Көмүөл алын кырыыта Нам улууһун Маймаҕатынан устар. Быыһааччылар Нам Арбыныгар, Уус Алдан Дыгдалыгар, Кэбээйи Сииттэтигэр уонна Батамайыгар бааллар. Алдан өрүс көмүөлэ Таатта, Томпо улуустарынан ааһар. Чугастааҕы күннэргэ Алдан көмүөлүн Өлүөнэҕэ түһэриэҕэ. Бүлүү өрүс көмүөлэ Үөһээ Бүлүү уонна Бүлүү улуустарынан холкутук устар. Муус алын кырыыта Бүлүү куораты ааста. Аны икки хас хонугунан өрүс Хатырык Хомонон эстиэҕэ. Бэҕэһээ Орто Халымаҕа муус харар түбэлтэтигэр туттарга анаан 8 туонна дэлби тэптэрэр тэрил тиэрдилиннэ, – диэтэ Алексей Колодезников.
Билиҥҥи туругунан 96 дьиэ, сүрүннээн киин куорат ыаллара, ууга бардылар. Өрөспүүбүлүкэ үрдүнэн халаан уута нэһилиэнньэлээх пууннары ылар түбэлтэтигэр дьону быстах олордор 231 пуун тэрилиннэ.
Хотугу өрүстэр уһуктан эрэллэр: Өлөөн мууһа көөрөттөр, оттон Дьааҥыга уонна Индигиркаҕа уу муус үрдүнэн чаалыйда, уу таһыма хамсаата. Халыма мууһа Магадан уобалаһынан хамсаата. Бу туһунан Ил Дархан уонна Бырабыыталыстыба пресс-сулууспата иһитиннэрэр.
Раиса Сибирякова, «Саха сирэ» хаһыат, edersaas.ru