Сүрүн Уопсастыба

Майатааҕы «Таптал көлүччэтэ» — норуот көҕүлээһинин түмүгэ

Үс сыллааҕыта Майа сэлиэнньэтигэр «Норуот  көҕүлээһинэ» бырагыраамаҕа кыттан, Майа олохтоохторо  «Манчаары» түөлбэҕэ  уруккута уу тохтуур бадараан сиригэр фонтан оҥорорго сүбэлэспиттэрэ. 

Билигин бу көлүччэ майалар саамай сөбүлээн сынньанар сирдэринэн буолла. Бу туһунан Майаҕа уопсастыбаннай сэбиэттэр үлэлэрин сүрүннээччи,  уопсастыбаннай кэрэспэдьиэммит Зиновий Игнатьев бэйэтин санаатын бу курдук үллэстэр:

2350 киһи куоластаан, харчы эбии уган,  бэртээхэй фонтан оҥоһулларын ситиспиппит. «Норуот күүһэ — көмүөл күүһэ» диэн маны этэн эрдэхтэрэ.  Ол түмүгэр «Таптал көлүччэтэ» диэн ааттанан, Майа олохтоохторо, ыалдьыттара кэрэхсии көрөр, мустар сирдэрэ баар буолбута.

Былырыын олохтоох дьаһалта кус иитэн, олор өссө сымыыт баттаан,  олохтоохтору үөрдэр кус үөрэ баар буола түспүтэ. Быйыл көлүччэ өссө тупсан, кустарбыт эбиллэн, сибэкки олордуллан, олохтоохтор сынньанар биир кэрэ миэстэбитинэн буолла.

Манна өссө былырыын муусукалаах ыскамыайкалары  туруорбуттара.  Мэҥэ Хаҥалас улууһуттан төрүттээх ырыаһыттарбытын төһө баҕарар истэбит. Эбиитин суотабай төлөпүөммүтүн  ииттэбит.

Быйыл күһүөрү иитиэх кустарга халлаантан чыркымай барахсан көтөн кэлэн эбилиннэ. Барахсан иитиэх кустарга тэҥнээтэххэ, кыччыгыйыан…

Олохтоох кустартан олох тэйиччи сылдьар.  Массыына тыаһыттан, дьонтон тэһииркээн көппөт. Аны эр дьон булчут хааннара оонньоон кэлэн, көрөн барар буоллулар. Күһүн кэлэн, чыркымайдар алаастарга үөрдэһэн көтөллөрө элбээтэ. Онон бу чыркымайбыт көтүһэр дуу, хаалар дуу диэн сэмээр кэтэһэбит.

Елена ПОТОЦКАЯ, «Саха сирэ» хаһыат, edersaas.ru

Хаартыска — Зиновий Игнатьев.

1
1