Үөһээ Бүлүү «Сказка» оҕо саадын иитиллээччилэрин төрөппүттэрэ дьиэҕэ-уокка туттар тэриллэртэн сахалыы муусука, дорҕоон таһаарар үстүрүмүөннэри оҥорбуттар.
edersaas.ru
Сатабыллаах төрөппүттэр хаһаайыстыбаҕа туттуллар малтан-салтан оҕолоругар саха музыкальнай тыаһын-ууһун таһаарар үстүрүмүөннэри хайдах толкуйдаан, айан оҥорбуттарын туһунан уһуйаан иитээччитэ Лия Николаева бу курдук кэпсиир:
— Соторутааҕыта улуустааҕы Муусука нэдиэлэтин тэрээһинигэр төрөппүттэри кытыннарарга санаммытым. Оҕону сааһынан көрөн, муусука сахалыы үстүрүмүөнүн оҥорорго этии киллэрбитим. Кырачааннарбыттан: «Ханнык муусука үстүрүмүөнүн билэҕиний?» — диэн ыйыттахха, гитараттан саҕалаан, металлофоҥҥа тиийэ ааттыыллар. Хомус тыаһын истибэтэх оҕолор бааллар. Ол иһин нэдиэлэни быһа төрөппүттэри кытта өбүгэлэрбит муусука, дорҕоон таһаарар тэриллэрин үөрэппиппит, ырыппыппыт. Ол түмүгэр бэйэ оҥоһуга сахалыы үстүрүмүөннэргэ быыстапка тэрийбиппит. Төрөппүттэр наһаа көхтөөхтүк кыттыыны ыллылар. Кинилэр сатабылларыттан бэйэбит да соһуйдубут. Онон бастакы саҕалааһын баар, салгыы өссө да үлэлэлиэхпит, — диэн кэпсиир уһуйааччы Лия Николаева.
Ол курдук, куукунаҕа туттар тэрил маннык тыаһы-ууһу таһаарар үстүрүмүөҥҥэ кубулуйбут.
Майаныас бааҥката бэртээхэй барабаан буолбут. Кырачаан киһи мантын баанан, кэтэн сылдьар буоллаҕа. Тэрил ыйааһына да киниэхэ сөп түбэһэрэ чахчы.
Мас илиниэйкэ эмиэ бэртээхэй муусука үстүрүмүөнүгэр кубулуйбут. Тутарга-хабарга эмиэ чэпчэки буолан, кырачааннар астына тыаһаталлар эбит.
Оттон бу пластик ыстакаан киһи билбэт буолан сытарын көрүҥ! Эчи, ойуута-таймата дьэрэкээнин. Манна туох эрэ тыастаах эттик угуллубута чахчы.
Утах пластик бытыылката эмиэ туһаҕа тахсыбыт. Маннык тэрил хас да баар — улахана, кырата , бэйэҥ талбытыҥ.
Оттон бу түннүк сабыытын ыйыырга туттуллар тэрил тыаска-ууска туттарга бэртээхэй үстүрүмүөн эбит.
Уҥуохтан оҥоһуллубут тэрил эмиэ дьикти тыаһы таһаарар буолуохтаах.
Эдэркээн иитээччи Лия Николаева 2016 сыллаахха ХИФУ төрүт култуура салаатын бүтэрбит. Кини Үөһээ Бүлүүтээҕи 7-с №-дээх «Сказка» оҕо саадыгар муусукаҕа дьарыктыыр. Кэрэхсэбиллээҕэ, бу уһуйаан Лия Афанасьевна улааппыт оҕо сааһын уйата эбит.
— Оҕо эрдэхпиттэн үҥкүүлүүр этим. Ол иһин төрөппүттэрим миигин Үөһээ Бүлүүтээҕи искусство оскуолатыгар үөрэттэрэ биэрбиттэрэ. Онно хореография салаатын үтэрбитим. Университекка төрүт култуура учууталын идэтин ылбытым. Төрөөбүт дойдубар учуутал миэстэтэ суох буолан биэрбитэ. Инньэ гынан бэйэм сылдьыбыт уһуйааммар, хата, миэстэ көстөн, оҕону муусука кэрэ алыбар үөрэтэбин. Идэбин кытта атылыы буолан, үлэлииргэ интэриэһинэй, — диэн кэпсиир эдэр педагог.
Лия Николаева биһиги «Саха сирэ» хаһыаппытыгар сурута кэлбиппитигэр кэллиэгэлэрин кытта үөрэ көрсүбүтэ. Туох эрэ сүтэрбитин булбуттуу, хаһыаппытын утаппыттыы ааҕан барбыта. Кини онно » Сатабыл» рубриканы «уруурҕаан» ааҕа олорорун көрөн, суруналыыс киһи, хата, мин бэйэм үөрбүтүм. Хаһыаппытын кытта билсэн баран, Лия Николаева:
— Мин сурутар эбиппин, — диэн биир бастакынан суруппута.
Ыччаттар Лия Николаева курдук үөрэхтэрин бүтэрэн кэлэн, бэйэлэрин төрөөбүт дойдуларын сайыннара сылдьалларыттан, ама, ким үөрбэт, санаата көнньүөрбэт буолуой?
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.