Ыам ыйын 25 күнүгэр Сахабыт сирин үгүс оскуолаларыгар 11 кылааһы бүтэрээччилэргэ тиһэх чуораан чугдаарда. Быйылгы үөрэх дьылын бүтэһик күннэригэр Мэҥэ Хаҥалас улууһун И.Г.Тимофеев аатынан Майа лицейин саха тылын, литературатын, төрүт култууратын учуутала, СӨ үөрэҕириитин туйгуна, РФ уопсай үөрэхтээһинин Бочуоттаах үлэһитэ Тамара Егоровна Слободчикова олоҕун биир кэрдиис кэмин — 60 сааһын бэлиэтиир өрөгөйдөөх күнүн үлэ-хамнас ортотугар көрүстэ.
Ол курдук, улуус биир чулуу учуутала «Киһи буолуу сэһэнэ: айар күүс, ис кыах, көҥүл тыын сайдар тускута» диэн ааттаах бэрт киэҥ ис хоһоонноох сэминээригэр биир санаалаахтарын, биир идэлээхтэрин түмтэ. Сэминээр үөрүүлээх аһыллыытыгар лицей дириэктэрэ Татьяна Спартаковна Попова: «Тамара Егоровна философскай суолталаах үтүө уопутун бүгүн үллэстиэҕэ«, — диэн туран кэлбит ыалдьыттарга, кыттыыны ылар үөрэнээччилэргэ, учууталларга ситиһиилээх үлэни баҕарда. Төрүт култуура учуутала Тамара Егоровна улууска оһуокайдьыт, алгысчыт быһыытынан биллэрин бу да сырыыга чиҥэтэн, ыалдьыттары көрсүү сиэрин-туомун ыытан, оһуокайынан түмүктээтэ.
Итиэннэ 14 саастарын туолбут 7-с кылаас үөрэнээччилэригэр оттомуруу, боччумуруу кэмин бэлиэтээн сиэри-туому ыытан алҕаата, арчылаата. Бу сырдык мичээрдээх 7-1 кылаас үөрэнээччитэ Анжела Старостина учуутала Тамара Егоровна киниэхэ эрэ анаан суруйбут кэмбиэрин тутан олорор. «Бэйэ суолун тэлэнии» диэн 7-1 кылаастарга Тамара Егоровна аһаҕас уруок ыыппытыттан көрбүт-истибит учууталлар бэрт элбэх сонун көстүүлэри бэлиэтэннилэр. Ол биир уратыта ити үөһэ этэн аһарбыт сурукпут буолар. Бу кылааска уопсайа 23 оҕо үөрэнэр эбит, кинилэр бары кылаастарын салайааччытыттан Тамара Егоровнаттан тус-туспа анаммыт кэмбиэрдээх суруктары тутан соһуйдулар да, үөрдүлэр да өссө ол суруктарын сорудах быһыытынан дьиэҕэ ааҕар буолан тарҕастылар.
Сэминээр бириэмэтигэр лицей учуутала Мидена Гаврильевна Петрова, библиотекарь Валентина Георгиевна Михайловалыын «Олох диэн дьиҥэ олус да кэрэ» Күннүк Уурастыырап айымньытынан 6 кылаастарга, Тумултан Анастасия Гаврильевна Дагданча «Ким доҕордоох — ол дьоллоох» 7-2 кылааска аһаҕас уруоктара, Чурапчы улууһуттан Д.Г.Барашков аатынан Бахсы орто оскуолатын биир бастыҥ учуутала Жанна Федоровна Барашкова «Төрүт дойду аата — аан дойдуга тахсар кынат», Дьокуускайтан ХИФУ доцена, Тамара Егоровна үөрэнээччитэ, Ньургуйаана Гаврильевна Никитина «Саха үөрэҕэ, киһи буолуу, олох олоруу сэһэнэ» маастар-кылаастары, лицейтэн омук тылын учуутала Таисия Павловна Маркова-Ким «Ситиһиилээх буолуу» кураатар чааһа үрдүк таһымҥа ыытылыннылар. Лицей учууталларын бөлөҕө «Удьуорбар саҥа суолу тэлэн»- диэн академик В.П.Ларионовка аналлаах үс тылынан таһаарбыт кинигэлэрин сэргэ Т.Е.Слободчикова, М.Г.Петрова 5-9 кылааска үлэлиир бырагырааманы оҥорон таһаарбыттарын сүрэхтэниитэ үгүс киһи болҕомтотун тартылар
Сэминээр үлэтэ саҕаланыаҕыттан түмүктэниэр диэри, Тамара Егоровна бииргэ үлэлиир педколлектива, олоҕун кэрчик кэмнэриттэн уус-уран ааҕыылартан саҕалаан, араас омук сириттэн эҕэрдэлии кэлбит ыалдьыттар оруолларын итэҕэтиилээхтик толорон көрү-нары оройуттан ылан, олус истиҥ-иһирэх эйгэни бэлэхтээн, кэлбит учууталлар санааларын кынаттаан, сарсыҥҥы күҥҥэ өссө үрдүк таһаарыылаах үлэни, туйгун доруобуйаны баҕаран тарҕастылар.
edersaas.ru саайтка анаан
Августина Хабарова.